Орталық сайлау комиссиясы шығып қалғандардың орнына Парламент депутаттарын тіркеді

2022 жылғы 3 мамырда Нұрлан Әбдіровтің төрағалығымен Қазақстан Республикасы Орталық сайлау комиссиясының отырысы өтіп, келесі қаулылар қабылданды:

Алматы облысынан Қазақстан Республикасы Парламенті Сенатының шығып қалған депутатының орнына 2022 жылғы 22 сәуірде сайланған депутатты тіркеу туралы

«Қазақстан Республикасындағы сайлау туралы» Қазақстан Республикасы Конституциялық Заңының 12, 45, 46 және 82-баптарына сәйкес, Алматы облысынан Қазақстан Республикасы Парламенті Сенатының шығып қалған депутатының орнына сайлау жөніндегі дауыстарды санау нәтижелері туралы Алматы облыстық сайлау комиссиясы хаттамасының және «Алматы облысынан Қазақстан Республикасы Парламенті Сенатының шығып қалған депутатының орнына 2022 жылғы 22 сәуірде болған сайлаудың қорытындыларын анықтау және жариялау туралы» Қазақстан Республикасы Орталық сайлау комиссиясының 2022 жылғы 26 сәуірдегі № 28/476 қаулысының негізінде Қазақстан Республикасының Орталық сайлау комиссиясы Жанболат Әкебайұлы Жөргенбаевты ҚР Парламенті Сенатының депутаты ретінде тіркеуге қаулы етті.

Қазақстан халқы Ассамблеясынан шығып қалған депутаттың орнына 2022 жылғы 28 сәуірде сайланған Қазақстан Республикасы Парламенті Мәжілісінің депутатын тіркеу туралы

«Қазақстан Республикасындағы сайлау туралы» 1995 жылғы 28 қыркүйектегі Қазақстан Республикасы Конституциялық заңының 12, 45, 46 және 98-баптарына сәйкес, Нұр-Сұлтан қалалық сайлау комиссиясының Қазақстан халқы Ассамблеясы сайлайтын Қазақстан Республикасы Парламенті Мәжілісінің шығып қалған депутатының орнына сайлау жөніндегі дауыстарды санау нәтижелері туралы Нұр-Сұлтан қалалық сайлау комиссиясы хаттамасының және «Қазақстан халқы Ассамблеясы сайлайтын Қазақстан Республикасы Парламенті Мәжілісінің шығып қалған депутатының орнына 2022 жылғы 28 сәуірде болған сайлаудың қорытындыларын анықтау және жариялау туралы» Қазақстан Республикасы Орталық сайлау комиссиясының 2022 жылғы 28 сәуірдегі № 29/477 қаулысының негізінде Қазақстан Республикасының Орталық сайлау комиссиясы Қазақстан халқы Ассамблеясынан сайланған Закиржан Пирмухамедович Кузиевті Қазақстан Республикасы Парламенті Мәжілісінің депутаты ретінде тіркеуге қаулы етті.

Сондай-ақ, осы күні Орталық сайлау комиссиясының Төрағасы Нұрлан Әбдіров Парламент депутаттары Жанболат Жоргенбаев пен Зәкіржан Күзиевке куәліктер мен омырауға тағатын белгілерді табыс етті.

Тапсыру барысында ол Жанболат Жоргенбаев пен Закиржан Кузиевтің Алматы облыстық мәслихатындағы белсенді депутаттық қызметтерін атап өтті.

Сөзінің соңында Нұрлан Әбдіров сайланған депутаттарға республиканың заң шығару билігін жүзеге асыратын жоғары өкілді органында табыс пен жемісті жұмыс тіледі.