ОСК мүшелері шығып қалғандардың орнына мәслихат 

депутаттарын сайлауға дайындықты пысықтау мақсатында 

өңірлерге инспекциялық сапарларын аяқтады

Еліміздің 16 өңірінде 2025 жылғы 26 қазан күні шығып қалғандардың орнына 71 бірмандатты сайлау округтері бойынша мәслихат депутаттарын сайлау (қосымша сайлау) өтеді, оның ішінде: 4 облыстық мәслихат депутаты, 15 қалалық мәслихат депутаты, 52 аудандық мәслихат депутаты сайланатын болады.

Бұл сайлау науқанына 429 сайлау комиссиясы: 16 аумақтық, 58 аудандық, қалалық, 70 округтік, 285 учаскелік сайлау комиссиялары, 2750 сайлау комиссиясы мүшелері жұмылдырылған.

Аталған науқанды өткізуге дайындық шеңберінде Қазақстан Республикасының Орталық сайлау комиссиясының мүшелері мен аппараттың жауапты қызметкерлері қосымша сайлау өтетін 13 өңірге инспекциялық сапармен барды. Атап айтқанда: ОСК Төрағасының орынбасары Мұхтар Ерман Жамбыл, Қарағанды, Түркістан облыстарына, ОСК хатшысы Шавхат Өтемісов Абай, Ақтөбе, Батыс Қазақстан, Маңғыстау, Ұлытау облыстарына, ОСК мүшесі Азамат Айманакумов Атырау, Қызылорда, Павлодар, Ұлытау облыстарына, ОСК мүшелері Михаил Бортник пен Ләззат Сүйіндік Қостанай облысына барды. Сонымен қатар ОСК мүшесі Ләззат Сүйіндік Қарағанды, Павлодар, Солтүстік Қазақстан облыстарында болды.

Сапардың мақсаты – сайлау комиссиялары мүшелерінің алдағы сайлау науқанына дайындығын бақылау, ұйымдастырушылық және құқықтық мәселелерді қарастыру, сондай-ақ сайлау процесінің ашықтығы, заңдылығы мен айқындығын қамтамасыз етуге бағытталған шараларды қабылдау.

Инспекциялық сапар барысында ОСК мүшелері құқық қорғау, мемлекеттік органдар және аумақтық сайлау комиссиялары басшыларының қатысуымен жиналыс өткізіп, мәслихат депутаттарын қосымша сайлауды ұйымдастырудың өзекті мәселелерін қарастырды. Жиында әрбір мемлекеттік органдар мен сайлау комиссияларының өз міндеттерін мүлтіксіз орындауына мән беріліп, сайлау науқанының заң талаптарына сай өтуі үшін қажетті шаралар пысықталды.

Сапар кезінде ОСК мүшелері Жас сайлаушылар клубтарының мүшелерімен кездесті. Кездесулер барысында жастарға еліміздегі сайлау жүйесі, сайлаушылардың құқықтары туралы жан-жақты ақпарат берілді. Сонымен қатар жастардың сайлау процестеріне қатысуының маңыздылығы, олардың қоғамдағы белсенді азаматтық ұстанымын қалыптастыру жолдары талқыланды.

Орталық сайлау комиссиясының мүшелері бірқатар сайлау учаскелерін аралап, олардың дайындық деңгейімен, материалдық-техникалық жабдықталуымен танысты. Сайлау учаскелерінде мүгедектігі бар адамдардың дауыс беруі үшін қажетті жағдайларды қамтамасыз етуге, сондай-ақ дауыс беру күні байқаушылар, бұқаралық ақпарат құралдарының өкілдері мен сенім білдірілген адамдардың өз қызметтерін заңда көзделген талаптарға сәйкес жүзеге асыру мәселесіне баса назар аударылды.

Сонымен қатар, аумақтық және учаскелік сайлау комиссияларының мүшелері үшін оқыту семинарлары ұйымдастырылып, онда мәслихат депутаттарын сайлауды өткізу, дауыс беру күніне дайындық, құжаттарды рәсімдеу және басқа да мәселелер талқыланды.

Семинар барысында қатысушылар нақты жағдайларға негізделген кейстік мәселелерді шешіп, өзара тәжірибе алмасты. Практикалық бөлімде сайлау учаскелерінде туындайтын жағдайларды шешу жолдары сараланып, учаскелік комиссия мүшелерінің іс-қимыл алгоритмдері зерделенді. ОСК мүшелері қатысушылардың барлық сұрақтарына жауап беріп, қосымша сайлауды өткізуде сайлау комиссияларының мүшелерінің назарына заңнама талаптарын қатаң ұстануды жеткізді.

Семинар соңында сайлау комиссияларының мүшелері сайлау заңнамаласы бойынша тестілеуден өтті.