2023 жылғы 21-22 қарашада ҚР ОСК аумақтық сайлау комиссияларының 

мүшелері үшін онлайн-оқыту семинарын өткізді

2023 жылғы 21-22 қарашада ҚР Орталық сайлау комиссиясы Электоралдық оқыту орталығының базасында аумақтық сайлау комиссияларының мүшелері үшін «Cайлау процесін құқықтық сүйемелдеу» тақырыбында онлайн-оқыту семинарын өткізді. Семинарға 257 адам қатысты.

Негізгі спикер ретінде ҚР Орталық сайлау комиссиясы аппаратының заң бөлімінің меңгерушісі Бауыржан Тұрғанбаев сөз сөйледі.

Тыңдаушыларға Қазақстан Республикасындағы сайлау құқығының қағидаттары мен құқықтық негіздері, соңғы сайлау циклі кезеңіндегі практикалық талдау мен статистиканы келтре отырып, сайлау туралы заңнаманы бұзғаны үшін құқықтық жауапкершілік туралы толық ақпарат ұсынылды. Сондай-ақ спикер жеке және заңды тұлғалардың жолданымдары мен өтініштерін қарау кезінде ӘРПК-нің бірқатар баптарын қолдану бойынша түсініктемелер берді.

Қосымша баяндамашылар облыстық сайлау комиссияларының төрағалары, мүшелері аудандар, облыстық маңызы бар қалалар әкімдерінің сайлауын өткізу кезеңіндегі талап-арыз тәжірибесімен бөлісті. Сондай-ақ аумақтық сайлау комиссияларының мүшелері сайлау туралы заңнаманы жетілдіру жөнінде бірқатар ұсыныстар енгізді.

Семинардың екінші бөлімінде тыңдаушылар сайлау кезеңіндегі құқықтық дауларға, сайлау процесіне қатысушылардың жолданымдары мен өтініштеріне, кандидаттарды және саяси партияларды тіркеу, сайлау алдындағы үгіт және т. б. бойынша даулы мәселелерге байланысты кейстерді талдау үшін топтарға бөлінді.

Семинар соңында тыңдаушылар барлық сұрақтарға жауап алып, пікір алмасты.