ОСК аудандар мен облыстық маңызы бар қалалар әкімдерін сайлау 

бойынша пилоттық өңірлерге инспекциялық сапарларды бастады

26-29 қыркүйек аралығында аудандар мен облыстық маңызы бар қалалар әкімдерін сайлау жөніндегі науқанды ұйымдастыру және өткізу шеңберінде Орталық сайлау комиссиясы төрағасының орынбасары Константин Петров және ОСК мүшелері Сәбилә Мұстафина мен Анастасия Щегорцова Солтүстік Қазақстан, Ақмола және Шығыс Қазақстан облыстарына барды.

Инспекциялық сапарлардың негізгі мақсаты алдағы әкімдерді тікелей сайлауды өткізетін аудандық сайлау комиссияларына баса назар аудара отырып, өңірлік сайлау органдарына әдістемелік көмек көрсету және оқыту болып табылады. Азаматтарды науқан кезеңдері мен дауыс беру күні туралы ақпараттандыру мәселесіне ерекше назар аударылды.

26-29 қыркүйекте ОСК төрағасының орынбасары Константин Петров Солтүстік Қазақстан облысына барды, онда облыстық мәслихат депутаттары әкімдерді сайлайтын үш ауданды анықтаған: Есіл, Тимирязев және Мәмлүт.

Константин Петров семинар-кеңестердің жұмысына қатысты, онда аумақтық сайлау комиссияларының өкілдері сайлауға дайындық туралы баяндады, сондай-ақ сайлау науқанының негізгі ерекшеліктері, сайлауды ұйымдастырудан бастап дауыс беру күніне дейінгі сайлау рәсімдері, әкімге кандидаттарды ұсыну және тіркеу тәртібі, сайлау алдындағы үгіт жүргізу, учаскелік сайлау комиссияларының сайлауға дайындық кезеңінде және оны өткізу күніндегі қызметі түсіндірілді.

Семинар-кеңестердің қорытындысы бойынша ОСК төрағасының орынбасары Константин Петров аудандық сайлау комиссиялары мүшелері мен учаскелік сайлау комиссиялары төрағаларының барлық сұрақтарына жауап берді. Іс-шараларға барлығы 180-ден астам адам қатысты.

26-28 қыркүйекте ОСК мүшесі Сәбила Мұстафина аумақтық сайлау комиссияларының Ақмола облысындағы учаскелік сайлау комиссияларының төрағаларын, төрағаларының орынбасарлары мен хатшыларын оқытуға қатысты, онда мәслихаттар бес аудан: Ақкөл, Астрахан, Жақсы, Есіл және Шортанды аудандарын белгілеген.

Жергілікті сайлауды ұйымдастырушыларға арналған оқыту семинарлары бағдарламасы шеңберінде «Дауыс беру күні» іскерлік ойыны өткізілді, оның барысында учаскенің ашылуынан бастап дауыстарды санауға дейінгі дауыс беру күнінің барлық кезеңдері егжей-тегжейлі қаралды.

Сонымен қатар, УСК мүшелері үшін сайлау процесіне қатысушылардың құқықтары мен міндеттері туралы кейс тапсырмалар дайындалды, дауыс беру күні туындайтын стандартты емес жағдайлар моделденіп, оларды шешу әдістері түсіндірілді, сондай-ақ сайлау комиссияларының мүшелері сайлау процесіне қатысушылармен тиімді қарым-қатынас жасаудың негізгі дағдыларына үйренді.

Семинарлар қорытындысы бойынша оқуға қатысушылар сайлау заңнамасын білуге тестілеуден өтті. Іс-шараларға барлығы 285 адам қатысты.

28-29 қыркүйекте Шығыс Қазақстан облысының мәслихаттың шешімімен әкімдердің алғашқы тікелей сайлауы өтетін Алтай және Глубокое аудандарында ОСК мүшесі Анастасия Щегорцованың қатысуымен сайлауды дайындау және өткізу бойынша көшпелі семинар-кеңестер ұйымдастырылды.

Семинарларда жергілікті атқарушы органдар мен прокуратура өкілдері сөз сөйлеп, сайлауға дайындық және науқанды өткізу кезеңінде заңдылықты сақтау бойынша атқарылған жұмыстар туралы баяндады.

Сайлау комиссиясының мүшелері үшін іскерлік ойын өткізілді, онда учаскелік сайлау комиссиялары мүшелерінің дауыс беру күні тиісті іс-қимыл алгоритмімен жұмысы көрсетілді. Оқыту тренингтеріне 500-ден астам сайлау комиссияларының мүшесі қатысты.

Семинар барысында Анастасия Щегорцова азаматтарды сайлау науқанының барысы туралы БАҚ және әлеуметтік желілер арқылы ғана емес, басқа да коммуникация құралдары арқылы уақтылы хабардар етудің маңыздылығын ерекше атап өтті.

Бұдан басқа, ОСК интернет-ресурсы арқылы әкімдер сайлауын ұйымдастыруға және өткізуге тартылған аумақтық және учаскелік сайлау комиссияларының мүшелері үшін қашықтықтан оқыту және тестілеу ұйымдастырылады, сондай-ақ Электоралдық оқыту орталығының базасында барлық облыстардың және 45 ауданның және облыстық маңызы бар қалалардың аумақтық сайлау комиссияларының мүшелеріне арналған бірқатар онлайн-семинарлар жоспарлануда.