Қазіргі уақытта Жамбыл облысында Тараз қаласының және аудан әкімдерінің учаскелік сайлау комиссияларына тапсырған актілеріне сай, сайлаушылардың жалпы саны 481 566 адам болды. Қарашаның 18-інен бастап жалпы жұрттың танысуы үшін сайлау учаскелеріне сайлаушылардың тізімдері ілінді.

Электрондық бюллетеньмен дауыс беру үшін сайлау учаскелерінің барлығы жабдықталған үй-жайларға орналастырылды, жеткілікті мөлшерде компьютерлермен, принтерлермен, байланыс телефондарымен жабдықталды. Барлық жерде дауыс беру үшін пайдаланылатын кабиналардың, тұрақты және тасымалданатын сайлау жәшіктерінің қажетті мөлшері дайындалды. Тараз қаласы бойынша барлығы 83 сайлау учаскесінде электрондық бюллетеньмен дауыс беру өткізілетін болады. Қазіргі уақытта электрондық әдіспен дауыс беруге үйренуге тілек білдірген сайлаушыларды оқып-үйрететін екі сайлау учаскесі жұмыс істеуде.
Облыстық сайлау комиссиясы қалалық және аудандық аумақтық сайлау комиссияларының төрағаларымен сайлау учаскелерінде дауыс берудің қортындыларын анықтау бойынша тренинг өткізді. Осындай семинар-тренингтер апта бойына барлық аудандарда және Тараз қаласында өтті. Облыстың барлық аудандық және қалалық аумақтық сайлау комиссиялары дауыс беруге арналған кабиналарға қажетті материалдармен, сайлау жәшіктерімен, сондай-ақ анықтамалық-ақпаратттық әдебиеттермен, жаднамалармен және т.б қамтамасыз етілді. Барлық сайлау учаскелеріне есептен шығару куәліктері жеткізілді.
ЕҚЫҰ Миссиясының ұзақмерзімдік байқаушылары бұған дейін Тараз қаласындағы бірқатар сайлау учаскелерінде болды.
Тәуелсіз байқаушылардың республикалық желісінің (ТБРЖ) өңірлік директоры Ж.Қалдарбеков сайлау үрдісінің барысына монторингтік байқау енгізу мәселесі бойынша Тараз қаласында байқаушыларға арналған екі күндік семинар-тренинг өткізді.
Орталық сайлау комиссиясы «Қазақстан Республикасы Орталық сайлау комиссиясы Инженерлік техникалық орталығы» Республикалық мемлекеттік кәсіпорынының мамандарымен бірлесіп, сайлау науқанын ұйымдастырушылармен және сайлаушылармен екі сайлау учаскесінің базасында электронды дауыс беру жүйесін пайдалануға арналған тренингтер күн сайын өткізілуде.

Өңір халқының электоралдық көңіл-күйін зерделеу мақсатында, қарашаның 23-інде 3000 респондентті қамти отырып, әлеуметтік сауалнама жүргізілді. Сауалнама жүргізудің нәтижесінде, респонденттердің 93,7 пайызы сайлау болатын күні сайлау учаскелеріне келу ниеттерінің барын мәлімдеді. Аталған әлеуметтік сауалнама нәтижелерін бұдан бұрынғы қоғамдық пікірді зерделеулермен салыстыра талдау, алдағы президенттік сайлауға қатысуға шешім қабылдаған сайлаушылар санының орташа есепен 3,3% пайызға ұлғайғанын көрсетті.