ҚР ОСК аппаратының құқықтық қамтамасыз ету бөлімінің меңгерушісі Жанна Тлембаева ҚР Бас прокуратурасының жанындағы Құқық қорғау органдарының академиясында дәріс оқыды

2019 жылғы 28 наурызда Қазақстан Республикасы Орталық сайлау комиссиясы аппаратының құқықтық қамтамасыз ету бөлімінің меңгерушісі Ж.У.Тлембаева Қазақстан Республикасы Бас прокуратурасының жанындағы Құқық қорғау органдарының академиясында «ҚР сайлау туралы» конституциялық заңының новеллалары» тақырыбында дәріс оқыды.

Дәріс барысында Қазақстан Республикасының сайлау заңнамасының жаңалықтары талқыланды, атап айтқанда, пропорционалды сайлау жүйесінің негізінде жергілікті мемлекеттік өкілді органдардың (мәслихаттардың) қалыптасуы, ІТ-технологияларды пайдалану негізінде сайлаушылар тізімдерін өзектендіру және нақтылау, сондай-ақ жекеленген құқықтық нормалар мен сайлау процесі институттарын жетілдіру туралы.

Сондай-ақ жергілікті атқарушы органдардың және сайлауды басқа ұйымдастырушылардың мүмкіндігі шектеулі азаматтардың сайлау құқықтарын іске асыруға және қамтамасыз етуге жауапкершілігі мәселелері де қаралды.

Курс тыңдаушылары – «құқық қорғау қызметі» және «заң» мамандықтарының магистранттары ұсынылған тақырыпты талқылауға белсенді қызығушылық танытты.

Дәріс соңында пікір алмасу болды.