2018 жылғы 20 желтоқсанда Ортсайлауком мүшесі З.Х. Баймолдинаның төрайымдық етуімен Қазақстан Республикасы Орталық сайлау комиссиясы жанындағы Сарапшылық-әдістемелік кеңестің 2018 жылғы кезекті отырысы болды

2018 жылғы 20 желтоқсанда Ортсайлауком мүшесі З.Х. Баймолдинаның төрайымдық етуімен Қазақстан Республикасы Орталық сайлау комиссиясы жанындағы Сарапшылық-әдістемелік кеңестің 2018 жылғы кезекті отырысы болды, онда Қазақстан Республикасының сайлау заңнамасын жетілдіру мәселелері бойынша оны одан әрі жетілдіру жөнінде ұсыныстар әзірлеу үшін отырысқа қатысушылар арасында жемісті пікір алмасу өтті.

Кеңес халықаралық нормалар мен шетелдік электораттық тәжірибені ескере отырып, ғылыми зерттеулер жүргізу мен консультативтік қызметтер көрсету арқылы қазақстандық сайлау заңнамасы мен құқық қолдану практикасын жетілдіру мақсатында құрылды.

Кеңес отырысына Кеңес мүшелері – ҚР Жоғарғы Соты жанындағы Соттардың қызметін қамтамасыз ету департаменті басшысының орынбасары А.С. Тукиев, ҚР Президенті жанындағы Қазақстан стратегиялық зерттеулер институты директорының орынбасары М.И. Жұмағұлов, Еуроралық құқық және адам құқықтары сарапшылық институтының директоры М.С. Башимов, халықаралық қатынастар бойынша заңгер М.А. Сәрсембаев, Л.Н. Гумилев атындағы Еуразия ұлттық университетінің заң факультеті деканы С.К. Амандықова, ҚР Жоғарғы Соты жанындағы Соттардың қызметін қамтамасыз ету департаменті талдау және жоспарлау бөлімі меңгерушісінің орынбасары Л.С. Жақаева қатысты.

Кеңес отырысында екі мәселе қаралды:

1) бас бостандығынан айыру орындарында отырған адамдардың дауыс беру жөніндегі халықаралық тәжірибе;

2) сайлау процесіндегі даулы мәселелерді шешуде медиация институтын қолдану мүмкіндігі.

Бірінші мәселе бойынша қамаудағылардың сайлау құқықтарын шектеумен байланысты мәселелерді шешудің халықаралық-құқықтық практикасы, атап айтқанда БҰҰ, ЕҚЫҰ, ТМД, Еуропалық адам құқықтары соты құжаттары, сондай-ақ бас бостандығынан айрылған азаматтардың сайлау құқықтарын шектеу жөніндегі жекелеген елдердің тәжірибесі талданды. Осындай талдаудың практикалық мәні сайлау ценздерін іске асыру процесінде туындайтын қоғамдық қатынастарды конституциялық-құқықтық реттеуді тұрақты жетілдіру қажеттігімен айқындалады.

Сайлау дауларын шешу кезінде бітімгерлік әлеуетін пайдалану туралы мәселенің өзектілігі медиация институтының сот тәртібіне балама ретіндегі мәнділігімен айқындалады. Отырысқа қатысушылар бұзылған сайлау құқықтарын қорғау тәсілі ретінде медиация сайлау жүйесінің ашықтығын қамтамасыз етіп, оның беделі мен сайлауға деген сенімді арттырады деген қорытындыға келді.

Сонымен қатар отырыста 2018 жылғы Кеңес жұмысының қорытындылары шығарылып, 2019 жылға арналған жұмыс жоспары бекітілді.