ҚР ОСК өкілдері 2018 жылғы 9 желтоқсанда Армения Республикасында сайлауды байқауға қатысты

Армения Республикасының Орталық сайлау комиссиясының шақыруымен Қазақстан Республикасы Орталық сайлау комиссиясының өкілдері 2018 жылғы 9 желтоқсанда өткен Армения Республикасының Ұлттық жиналысының депутаттарын кезектен тыс сайлауға байқаушылар ретінде қатысты.

Қазақстан Республикасының Орталық сайлау комиссиясының атынан делегацияның құрамына Орталық сайлау комиссиясы Төрағасының орынбасары К.В. Петров және «ҚР ОСК ИТО» РМК директоры Е.С.Қосмұратов енгізілді.

Қазақстандық делегацияның сапары аясында Константин Викторович Петровтың Армения Республикасы Орталық сайлау комиссиясының Төрағасы Тигран Толикович Мукучянмен ресми кездесуі өтті. Кездесу барысында Армения Республикасы Орталық сайлау комиссиясының басшысы сайлау науқанының негізгі кезеңдері, сайлауды дайындау мен өткізу, сайлау науқанының ерекшеліктері туралы хабардар етті. Сондай-ақ Қазақстан мен Арменияның сайлау органдары арасындағы сайлау процесін жетілдіру саласындағы екіжақты ынтымақтастығы мәселелері талқыланды.

Сондай-ақ жоғарыда аталған сайлауды байқауға Қазақстан Республикасының 11 өкілі қатысты, оның екеуі Армения Республикасы Ортсайлаукомының шақыруымен, алтауы - ТМД байқаушылар миссиясының құрамында, екеуі - ТМД Парламентаралық Ассамблеясы желісі бойынша және біреу - ЕҚЫҰ ПА делегациясының құрамында.

Сайлау күні Қазақстан Республикасының өкілдері дауыс беру процесін, дауыстарды санауды және сайлау қорытындыларын шығаруды байқау үшін түрлі өңірлерде және Армения Республикасының астанасында 50-ден астам сайлау учаскелерінде болды.

Жалпы қазақстандық байқаушылар сайлау науқанының ұйымдастырылған деңгейде өткізілгенін атап өтті, сайлау комиссиялары Армения Республикасының қолданыстағы сайлау заңнамасына сәйкес сайлауды дайындау мен өткізу бойынша практикалық және техникалық шаралар қабылдады.