БАСПАСӨЗ РЕЛИЗІ

2017 жылғы отырысында 22 мамырда Қазақстан Республикасының Ортсайлаукомының 2017 жылғы 28 маусымға тағайындалған Қазақстан Республикасы Парламентінің Сенаты депутаттарының сайлауында Қазақстан Республикасы Парламенті Сенатының депутаттығына кандидаттың республикалық бюджет қаражатынан жабылатын шығыстарының мөлшерлерін белгілеу туралы мәселе қаралды

2017 жылғы 22 мамырда 2017 жылғы 28 маусымға тағайындалған Қазақстан Республикасы Парламентінің Сенаты депутаттарының сайлауын ұйымдастырудың кейбір мәселелеріне арналған Қазақстан Республикасы Орталық сайлау комиссиясының отырысы болды.

Ортсайлаукомның отырысында 2017 жылғы 28 маусымға тағайындалған ҚР Парламенті Сенатының депутаттарын сайлауда
ҚР Парламенті Сенатының депутаттығына кандидаттың республикалық бюджет қаражатынан жабылатын шығыстарының мөлшерлері қаралды.

ҚР ОСК Төрағасының орынбасары  В.К. Фоос атап көрсеткендей, «Қазақстан Республикасындағы сайлау туралы» Конституциялық заңның 28-бабының 3-тармағына сай мемлекет кандидаттарға өз бағдарламаларымен бұқаралық ақпарат құралдарына шығуы үшiн бiрдей қаражат бөлiнуіне кепілдік береді.

Республикалық бюджет қаражатынан:

сайлау комиссияларын ұйымдастыру мен оның қызметiне, үй-жайды жалға алуға, iссапар шығыстарына;

кандидаттардың бұқаралық ақпарат құралдарындағы сөздерiне – әр кандидатқа теледидардан он бес минуттық сөз сөйлеуiне, радиодан он минуттық сөз сөйлеуіне, сондай-ақ баспа басылымдарында 0,1 баспа табақтан аспайтын көлемде екi мақала жариялауына қаражат беріледі);

кандидаттардың сайлау алдындағы көпшiлiк шараларын өткiзуге және  кандидаттардың үгiт материалдарын (плакаттар, листовкалар, ұрандар мен өзге де үгіттiк баспа материалдарын) шығаруға;

кандидаттардың Орталық сайлау комиссиясы белгiлеген мөлшерде көлiкке;

сайлау комиссиясының үй-жайы мен дауыс беруге арналған үй-жайда орналастырылатын Парламент Сенатының депутаттығына кандидаттар туралы ақпараттық плакаттарды дайындауға жұмсаған шығындары жабылады.

2017 жылғы 28 маусымға тағайындалған ҚР Парламенті Сенаты депутаттарының кезекті сайлауына республикалық бюджеттен 92 млн теңге бөлінді.  

ҚР ОСК қаулы қабылдады, оған сәйкес ҚР Парламенті Сенатының депутаттығына әрбір кандидатқа республикалық бюджет қаражатынан шығыстардың мынадай мөлшерлері бөлінеді:

1) бағдарламаны теледидар арқылы баяндау – 165 000 (жүз алпыс бес мың) теңге сомасында;

2) бағдарламаны радио арқылы баяндау – 70 000 (жетпіс мың) теңге сомасында;

3) баспа басылымдарында екі мақала жариялау – 125 000 (жүз жиырма бес мың) теңге сомасында;

4) сайлау алдындағы көпшiлiк шараларын өткiзуге және үгiт материалдарын шығаруға – 30 000 (отыз мың) теңге сомасында;

5) көліктік шығыстар: облыстар үшін – 70 000 (жетпіс мың) теңге сомасында, Астана және Алматы қалалары үшін – 30 000 (отыз мың) теңге сомасында.

Республикалық бюджет қаражатынан қаржыландыру жергілікті атқарушы органдардың осы мақсаттарға арнап ашылған шоттары арқылы жүзеге асырылады. Бұл шоттарға түсетін бюджет қаражатына иелік етуді облыстық, Астана және Алматы қалалық сайлау комиссиялары жүзеге асырады.