2011 жылғы 18 ақпан күні Орталық сайлау комиссиясында лингвистикалық комиссияның отырысы болып өтті
2011 жылғы 18 ақпан күні Қазақстан Республикасы Орталық сайлау комиссиясында Қазақстан Республикасы Президенттігіне кандидаттың мемлекеттік тілді еркін меңгергендігін анықтау жөніндегі лингвистикалық комиссияның кандидат Т.Н.Баймурзиннің мемлекеттік тілді еркін меңгергендігін анықтау бойынша отырысы болып өтті.
Өткізілген емтихан нәтижелері бойынша лингвистикалық комиссия ашық дауыс беру арқылы бірауыздан Қазақстан Республикасы Президенттігіне кандидат Толыбай Нұрділдәұлы Баймурзин мемлекеттік тілді еркін меңгермеген деген шешім қабылдады.
«Т.Баймурзин «Перзент парызы» деген тақырыпқа шығарма жазды. Оның шығармасы өте сауатсыз. Орфографиялық 24 қате, тыныс белгілерінен -23, стильдік 5 қате жіберді. Барлығы 52 қате. Екінші кезеңде ол Ғабит Мүсіреповтың шығармаларынан үзінді оқыды. Т.Баймурзин мәтінді кібіртіктеп, созбалап әзер оқыды. Ал үшінші кезеңдегі «Батырлық пен сүйспеншілік» тақырыбы мүлдем ашылмады. Үміткер тіпті сөйлем құрай алмады. Осының барлығын ескере отырып, комиссия мүшелері Т.Баймурзин қазақ тілін меңгермеген деген шешімге келді»,- деп атап өтті Қазақстан Республикасы Президенттігіне кандидаттың мемлекеттік тілді еркін меңгергендігін анықтау жөніндегі лингвистикалық комиссияның төрағасы М.Жолдасбеков
Лингвистикалық комиссияның отырысына Қазақстан Республикасы Орталық сайлау комиссиясының мүшесі Л.Ж.Сүлеймен қатысты.

Қазақстан Республикасы
Орталық сайлау комиссиясының
баспасөз орталығы
тел. 75-21-32, 75-28-43, 75-28-44