БАСПАСӨЗ РЕЛИЗІ

Қазақстан Республикасы Орталық сайлау комиссиясының мүшесі М.А. Сәрсембаев ЕҚЫҰ/ДИАҚБ ұйымдастырған «Сайлауды байқау және ЕҚЫҰ/ДИАҚБ Миссиясының ұсынымдарын орындау» тақырыбындағы семинар жұмысына қатысты

Қазақстан Республикасы Орталық сайлау комиссиясының мүшесі М.А. Сәрсембаев 2016 жылғы 2 қарашада Вена (Австрия) қаласында «Сайлауды байқау және ЕҚЫҰ/ДИАҚБ Миссиясының ұсынымдарын орындау» тақырыбында өткен семинар жұмысына қатысты.

Іс-шараның әкімшісі Еуропадағы қауіпсіздік және ынтымақтастық ұйымының Демократиялық институттар және адам құқықтары жөніндегі бюросы (ЕҚЫҰ/ДИАҚБ) болды, ал оған ЕҚЫҰ-ның сайлау жөніндегі сарапшылары, парламенттердің депутаттары, сайлау органдарының, халықаралық ұйымдардың және ЕҚЫҰ-ға қатысушы мемлекеттердің ҮЕҰ өкілдері қатысты.

Пленарлық отырыс барысында сайлау саласындағы халықаралық міндеттемелер, әйелдердің қатысуын ынталандыру, мүмкіндіктері шектеулі адамдардың сайлау құқықтарын қорғау сияқты сайлау стандарттарындағы оң өзгерістер талқыланды. Бұл ретте ЕҚЫҰ/ДИАҚБ Миссиясының ұсынымдарын орындау жөніндегі қиындықтар, атап айтқанда сайлау науқанын қаржыландырудың айқындығы мен сайлау науқаны барысында кандидаттар мен партияларды әкімшілік қолдау мәселелері атап өтілді.  

Сонымен қатар семинарға қатысушылар ЕҚЫҰ/ДИАҚБ ұсынымдарын орындау жөніндегі практиканы, ЕҚЫҰ-ға қатысушы мемлекеттердің осы үшін қолданатын арнайы тетіктерін қарауға аса көңіл бөлді.

Ұсынымдарды орындауға ынталандырудағы ұлттық парламенттер мен парламенттік ассамблеялардың рөлі, сондай-ақ ЕҚЫҰ/ДИАҚБ ұсынымдарын іске асыру процесіндегі ҮЕҰ-ның рөлі ерекше атап өтілді.

Cеминардың аяқталуы кезінде ЕҚЫҰ/ДИАҚБ-ның сайлау саласындағы бұдан әрі қызметі туралы пікір алмасу болды. Іс-шараға қатысушылар басты бағыттардың бірі: заңнамаларға шолу, заң жобалау қызметіндегі құқықтық сараптама, заңнаманың сайлау бөлігіндегі жекелеген бөлімдерін терең бағалау, ұсынымдарды орындау бойынша және басқа да үздік электораттық практика бойынша техникалық көмек, ҮЕҰ-дан сайлауды байқаушылар топтарын қолдау, аралық бағалау сапарлары, сондай-ақ көмек және үйлестіру болып табылатынын атап өтті.