2011 жылғы 26 ақпанда Орталық сайлау комиссиясы Қазақстан Республикасының Президенттігіне кандидаттардың республикалық бюджет қаражатынан жабылатын шығыстарының нормативтерін белгіледі
2011 жылғы 26 ақпанда Орталық сайлау комиссиясының отырысында Қазақстан Республикасының Президенттігіне кандидаттардың республикалық бюджет қаражатынан жабылатын шығыстарының нормативтерін белгілеу туралы қаулы қабылданды.
Сайлау заңнамасына сәйкес, мемлекет кандидаттарға өз бағдарламаларымен бұқаралық ақпарат құралдарына шығуы үшін бірдей қаражат бөлінуіне кепілдік береді. Әрбір кандидаттың теледидардан он бес минут сөз сөйлеуіне, радиодан он минут сөз сөйлеуіне, ондай-ақ баспа басылымдарына 0,1 баспа табақтан аспайтын көлемде екі мақала жариялауына қаражат беріледі.
Кандидаттарға сайлауалды үгіт жүргізуге бөлінетін сомаларды есептеу негізіне Қазақстан Республикасы Байланыс және ақпарат министрлігі ұсынған мәліметтер алынды.
Бұл ретте, кандидаттың бағдарламасын теледидар арқылы баяндауына 4 625 000 теңге сомасындағы қаражат бөлінеді. Радиодан 10 минут сөйлеуге әрбір кандидатқа бөлінетін сома 169 000 теңге.
Баспа басылымдарында 540 шаршы см. көлемінде екі мақала жариялау үшін кандидаттардың әрқайсына 810 000 теңге бөлінетін болады.
Одан басқа, кандидаттарға сайлаушылармен кездесулер өткізу үшін үй-жайлар жалдауға 200 000 теңге, сондай-ақ баспа үгіт материалдарын басып шығаруға 290 000 теңге қаражат беріледі.
Тіркелген әрбір кандидатқа көлік шығындары үшін тағы 200 000 теңге бөлінеді.

Қазақстан Республикасы
Орталық сайлау комиссиясының
баспасөз орталығы
тел. 75-21-32, 75-28-43, 75-28-44