| 17.02.2016 |
|
БАСПАСӨЗ РЕЛИЗІ
Орталық сайлау комиссиясында Қазақстан халқы Ассамблеясының
Қазақстан Республикасы Парламенті Мәжілісінің депутаттарын сайлауды өткізу
тәртібі туралы брифинг болды
17 ақпанда Орталық сайлау комиссиясында Қазақстан халқы Ассамблеясы сайлайтын Қазақстан Республикасы Парламенті Мәжілісінің депутаттарын сайлау тәртібі туралы брифинг болды.
Ассамблея сайлайтын Мәжіліс депутаттарын сайлауды әзірлеу мен өткізу жөніндегі негізгі іс-шаралардың күнтізбелік жоспары Ортсайлаукомның 2016 жылғы 20 қаңтардағы отырысында бекітілді. Аталған жоспарға сәйкес Мәжіліс депутаттығына кандидаттарды ұсыну 20 ақпанда басталып, 29 ақпанда аяқталады.
ҚР ОСК мүшесі Т.В. Охлопкова атап өткендей, Ассамблея сайлайтын Мәжіліс депутаттығына кандидаттарға қойылатын талаптардың партиялық тізімдер бойынша сайланатын Мәжіліс депутаттығына кандидаттарға қойылатын талаптардан айырмашылығы жоқ. Кандидаттарды ұсыну құқығы Қазақстан халқы Ассамблеясына сессиялар арасындағы кезеңде басшылық ететін және қазіргі уақытта 67 адамнан тұратын Ассамблея Кеңесіне тиесілі.
Кандидаттарды тіркеуді Ортсайлауком 29 ақпан - 5 наурыз аралығындағы кезеңде жүргізеді.
Ассамблея сайлайтын Мәжіліс депутаттығына кандидаттар сайлау жарнасын төлемейді және сайлау қорын құрмайды.
Ассамблеяның жоғарғы басқарушы органы сессияны Қазақстан Республикасының Президенті шақырады. Сессияны шақыру туралы өкім оның басталуына 30 күн қалғанда қабылдануы тиіс, ол туралы бұқаралық ақпарат құралдарында хабарланады. Сессия жұмысына Ассамблея мүшелері жалпы санының кемінде үштен екі бөлігі қатысқан жағдайда, сессия заңды деп саналады. Оған қатысқан мүшелердің жартысынан көбі дауыс берген жағдайда, сессия қабылданды деп есептеледі. Осы күнге Қазақстан халқы Ассамблеясының құрамында 446 мүше бар.
Дауыс беруге арналған пункт Ассамблея Сессиясы өтетін ғимаратта орналасады және Сессия жұмысы басталғанға дейін бір сағат бұрын ашылады.
Дауыс беруге арналған пункте халықаралық және қазақстандық байқаушылар, бұқаралық ақпарат құралдарының өкілдері, сондай-ақ Ассамблея сайлайтын Мәжіліс депутаттығына кандидаттардың сенім білдірілген адамдары болуға құқылы.
Сессияда Астана қаласының қалалық сайлау комиссиясының төрағасы дауыс беру тәртібін түсіндіргеннен кейін Ассамблея мүшелерін дауыс беруге арналған пунктке шақырады.
Әр сайлаушы жеке өзі дауыс береді. Дауыс беру құқығын басқа біреуге беруге, басқа адамдар үшін дауыс беруге болмайды. Дауыс беруге арналған бюллетень сайлаушылар тізімінің негізінде сайлаушының жеке өзіне оның жеке басын куәландыратын құжатын ұсынғанда беріледі.
Дауыс беру және дауыстарды санау аяқталған соң қалалық сайлау комиссиясы дауыс беру қорытындылары туралы хаттама жасап, қол қояды. Дауыс беруге қатысқан Ассамблея мүшелерінің 50 пайыздан астамы дауыс берген кандидаттар сайланған деп саналады.
Сессия қалалық сайлау комиссиясының төрағасы дауыс беру қорытындылары туралы хаттаманы жариялағаннан кейін жабылады. Қалалық сайлау комиссиясының хаттамасы Ортсайлаукомға екі күннен – 22 наурыздан кешіктірмей ұсынылуы тиіс.
Мәжілістің сайланған депутаттарын Ортсайлауком тіркейді. Конституцияға және Республика заңдарына сәйкес Парламент депутатының мәртебесіне сәйкес келмейтін міндеттерін доғару туралы Ортсайлаукомға ұсынған өтініші Мәжіліс депутаттарын тіркеу үшін міндетті шарт болып табылады.
Жалпы Республика бойынша Мәжіліс депутаттарын сайлау қорытындыларын Ортсайлауком 27 наурыздан кешіктірмей белгілейді, ал сайлау қорытындылары туралы хабар БАҚ-та 2016 жылғы 30 наурыздан кешіктірмей жарияланады.
Бұқаралық ақпарат құралдарында сайлау қорытындылары жарияланғаннан кейін Ортсайлауком Парламент Мәжілісінің сайланған әр депутатына куәлік пен омырауға тағатын белгі тапсырады.
- Абай облысы
- Ақмола облысы
- Ақтөбе облысы
- Алматы облысы
- Атырау облысы
- Батыс Қазақстан облысы
- Жамбыл облысы
- Жетісу облысы
- Қарағанды облысы
- Қостанай облысы
- Қызылорда облысы
- Маңғыстау облысы
- Павлодар облысы
- Солтүстік Қазақстан облысы
- Түркістан облысы
- Ұлытау облысы
- Шығыс Қазақстан облысы
