БАСПАСӨЗ РЕЛИЗІ

2016 жылғы 10 ақпанда Қазақстан Орталық сайлау комиссиясының

отырысы болды

10 ақпанда Қазақстан Республикасы Орталық сайлау комиссиясының отырысы болды, онда Сайлау туралы заңның 19-бабы 6-тармағының екінші бөліміне және 8 тармағына сәйкес Ортсайлауком, сайлау заңнамасында белгіленген тәртіппен сайланғанға дейін, Алматы облыстық сайлау комиссиясының мүшесі етіп Т.Е. Дәуітовты, Атырау облыстық сайлау комиссиясының мүшесі етіп Ғ.Ш. Қанатовты, Қарағанды облыстық сайлау комиссиясының мүшесі етіп А.Г. Степаненконы, Қостанай облыстық сайлау комиссиясының мүшесі етіп Г.А. Герасимовты, Павлодар облыстық сайлау комиссиясының мүшесі етіп Н.П. Чудовскийді, Оңтүстік Қазақстан облыстық сайлау комиссиясының мүшесі етіп Ә.М. Әлішевті тағайындады.  

Сондай-ақ Ортсайлауком отырысында Қазақстан Республикасы Парламенті Мәжілісінің және мәслихаттарының депутаттарын сайлауға дайындық барысы туралы Астана қалалық сайлау комиссиясының есебі ұсынылды.

Астана қалалық сайлау комиссиясының төрағасы И. Жалбыров Ортсайлауком мүшелерін қалада қалалық мәслихат депутаттарын сайлау бойынша 25 сайлау округі, 278 сайлау учаскесі құрылғаны, олардың 213-і қала аумағында және 65-і Қазақстан Республикасының шетелдегі өкілдіктерінің жанында орналасқаны туралы мәлімдеді.

Астана қаласы бойынша сайлауды ұйымдастыруды және өткізуді жалпы саны 2149 мүшесі бар 307 сайлау комиссиясы, олардың ішінде 4 аумақтық, 25 округтік және 278 учаскелік комиссиясы жүзеге асырады. Қалалық сайлау комиссиясы сайлау комиссияларын оқытуды ұйымдастыруға ерекше көңіл бөледі, ол үшін семинар, тренинг, кеңестер өткізуден бастап қажетті сайлау құжаттарымен және әдістемелік құралдармен қамтамасыз етуге дейін, түрлі нысандарды қолдануда.

Қазіргі уақытта қалалық мәслихат депутаттығына кандидаттарды ұсыну және тіркеу жүргізілуде. 2016 жылғы 9 ақпандағы жағдай бойынша 25 сайлау учаскесінде 27 кандидат (18 ер адам және 9 әйел адам) ұсынылды. Олардың 26-сының жоғары білімі бар.

Округтік сайлау комиссиялары ұсынылған кандидаттардың Конституцияда және «Қазақстан Республикасындағы сайлау туралы» Конституциялық заңында белгіленген талаптарға сәйкестігін тексеру бойынша қажетті жұмыстар жүргізуде, кандидаттардың және олардың сенім білдірілген адамдарын тіркеуді жүзеге асыруда. Қазіргі уақытта 3 кандидат тіркелді.

Сайлауалды үгітті жүргізуге қатысты шаралар уақтылы қабылдануда. Қалалық сайлау комиссиясымен келісім бойынша партиялық тізімін ұсынған саяси партиялар үшін, сондай-ақ қалалық мәслихат депутаттығына кандидаттар үшін үгіттік баспа материалдарын орналастыру орындары анықталды. Саяси партиялардың және кандидаттардың сайлаушылармен кездесулер өткізуі үшін, шарттық негізде ұсынылған үй-жайлар тізбесі бекітілді.