2015 жылғы 27 сәуірде сағат 10.00-де Қазақстан Республикасы Орталық сайлау комиссиясының брифингі өтті, оның барысында Ортсайлауком Төрағасы Қ. Тұрғанқұлов Қазақстан Республикасы Президентінің сайлауына сайлаушылардың келуінің соңғы қорытындыларын жария етті. Ол 95,22 %-ды құрады.

«Егемен Қазақстан тарихында бірінші рет сайлаушылар өздерінің азаматтық ұстанымын, электораттық белсенділігін және елдің болашағы үшін саяси жауапкершілігін айқын көрсетті. Осыған, сондай-ақ сайлау науқанын ұйымдастыру деңгейінің артқанына бірінші кезекте байқаушылар мен сарапшылар өздерінің түсініктемелерінде көңіл аударды», - деп атап өтті Ортсайлауком Төрағасы.

Сонымен қатар облыстық, Астана және Алматы қалалық сайлау комиссияларынан келіп түскен жедел деректер негізінде сайлаудың алдын ала қорытындылары анықталды.

ҚР ОСК-ға келіп түскен ақпаратқа сәйкес сайлаушылар дауысы келесідей бөлінді:

Әбілғазы Қалиақпарұлы Құсайыновқа сайлаушылардың 0,7 %-ы дауыс берді.

Нұрсұлтан Әбішұлы Назарбаевқа – 97,7 %.

Тұрғын Ысқақұлы Сыздықовқа – 1,6 %.

Ортсайлауком Төрағасы аумақтық сайлау комиссиялары хаттамаларының келіп түсуіне қарай бұл деректер нақтыланады, бұған заңнамамен екі күн беріледі.

Сайлау туралы заңға сәйкес 26 сәуірде өткен Қазақстан Республикасының Президентін сайлаудың соңғы нәтижесімен Орталық сайлау комиссиясы сайлаудан кейін жеті күн мерзімнен, яғни 2015 жылғы 3 мамырдан кешіктірмей белгілеуі тиіс.

Қазақстан Республикасы
Орталық сайлау комиссиясының
баспасөз қызметі
тел. 75-23-69