2011 жылғы 22 ақпан күні Орталық сайлау комиссиясында лингвистикалық комиссияның отырысы болып өтті
2011 жылғы 22 ақпан күні Қазақстан Республикасы Орталық сайлау комиссиясында Қазақстан Республикасы Президенттігіне кандидаттың мемлекеттік тілді еркін меңгергендігін анықтау жөніндегі лингвистикалық комиссияның кандидат Ж.Ә.Бәзілбаевтың мемлекеттік тілді еркін меңгергендігін анықтау бойынша отырысы болып өтті.
Өткізілген емтихан нәтижелері бойынша лингвистикалық комиссия ашық дауыс беру арқылы бірауыздан Қазақстан Республикасы Президенттігіне кандидат Жақсыбай Жақсыбай Әбішұлы Бәзілбаев мемлекеттік тілді еркін меңгерген деген шешім қабылдады.
Қазақстан Республикасы Президенттігіне кандидаттың мемлекеттік тілді еркін меңгергендігін анықтау жөніндегі лингвистикалық комиссияның төрағасы М.Жолдасбеков комиссияның шешімін жариялай келе, Президенттіктен үміткер Ж.Бәзілбаев емтиханның бірінші кезеңінде «Абай қазақ халқының рухани көсемі» атты тақырыпта 2 бет шығарма жазды. Жазба жұмысы орташа жазылған. Орфографиялық 3 қате, тыныс белгісінен – 4, стильдік 3 қате бар. Бәрін қосқанда 10 қате.
Екінші талап бойынша үміткер Жүсіпбек Аймауытовтың шығармаларынан үзінді оқыды. Кейбір орфоэпия нормалары бойынша ауытқулар болды. Бірақ орташа оқыды деп бағалауға болады. Үшінші кезеңде «Абыройлы іс» атты тақырыпта сөйледі. Үміткер тақырыпты ашты, өз ойын жеткізе білді. Осылардың барлығын ескере келгенде біз Ж.Бәзілбаев қазақ тілін меңгерген деген қорытынды шығардық»,- деп атап өтті.
Лингвистикалық комиссияның отырысына Қазақстан Республикасы Орталық сайлау комиссиясының мүшесі Л.Ж.Сүлеймен қатысты.

Қазақстан Республикасы
Орталық сайлау комиссиясының
баспасөз орталығы
тел. 75-21-32, 75-28-43, 75-28-44