2011 жылғы 26 ақпанда Қазақстан Республикасы Орталық сайлау комиссиясының Төрағасы Қ.Т.Тұрғанқұловтың Ресей Федерациясы мен Беларусь Республикасы бұқаралық ақпарат құралдары өкілдерімен кездесуі болып өтті
2011 жылғы 26 ақпанда Қазақстан Республикасы Орталық сайлау комиссиясының Төрағасы Қ.Т.Тұрғанқұловтың Ресей Федерациясы мен Беларусь Республикасы бұқаралық ақпарат құралдары өкілдерімен кездесуі болып өтті.
Ресейлік және белоруссиялық БАҚ өкілдері Президенттің кезектен тыс сайлауын тағайындауға, ұйымдастыруға және өткізуге байланысты Қазақстанда болып жатқан уақиғалармен, сондай-ақ Қазақстан Республикасының сайлау заңнамасы мен сайлау жүйесінің жалпы даму үдерістерімен кеңірек танысуға қазығушылық білдірді.
Ортсайлауком Төрағасы делегация мүшелерін Орталық сайлау комиссиясының кезектен тыс сайлауды әзірлеу және өткізу бойынша атқарып отырған жұмысымен, сайлау науқанының негізгі кезеңдерімен, сондай-ақ 20 ақпан күні аяқталған кандидаттарды ұсыну кезеңінің қорытындыларымен таныстырды.
Кездесу барысында Қуандық Тұрғанқұлов делегация мүшелерінің сайлаудың құқықтық негіздеріне, тәуелсіз Қазақстанның сайлау жүйесінің қалыптасу тарихына, Конституция мен сайлау туралы заңның елдегі ең жоғары лауазымнан үміткерлерге қоятын талаптарына, Қазақстан Республикасы Президентінің кезектен тыс сайлауын ұйымдастыру мен өткізуге бөлінген бюджет қаражатының мөлшеріне, саяси партиялардың қызметіне, Ортсайлауком мен сайлау процесіне қатысушылардың бұқаралық ақпарат құралдарымен өзара әрекеттестігіне, сайлау үдерісінің айқындығын қамтамасыз етуге, барлық кандидаттардың БАҚ-тарға тең қол жеткізуін қамтамасыз ету тетіктеріне, сайлаудың қорытындыларын шығару процесіне, келіп түскен арыздар мен шағымдардың санына қатысты сұрақтарына жауап берді.
Сондай-ақ, Ортсайлауком басшысы БАҚ өкілдерін электоралдық науқанға халықаралық байқаушылардың қатысуы, қазақстандық және халықаралық байқаушылардың құқықтары туралы хабардар етті.
Шетелдік журналистердің сауалдарына жауап бере келе, Қ. Тұрғанқұлов сайлау науқанының басталуына орай саяси партиялардың белсенділігінің арта түскенін атап өтті. Олардың барлығы дерлік белсенді насихат жұмысын жүргізіп, өздерінің өкілдерін Орталық және аумақтық сайлау комиссияларының құрамына жолдауды, сондай-ақ сайлауды байқауға қатысуды көздеуде.
Сонымен қатар халықаралық ұйымдардың да сайлауаралық кезеңге қарағанда белсенділігінің артып отырғаны байқалады. Олар сайлау науқаны кезеңінде әртүрлі оқыту бағдарламаларын іске асыруға және сайлаушылар үшін баспа өнімдерін таратуға ұмтылуда. Бұл «Қазақстан Республикасындағы сайлау туралы» Конституциялық заңға қайшы келеді. Ортсайлауком басшысы мұндай бағдарламаларды Республиканың сайлауды ұйымдастырушыларымен бірлесіп тек сайлаулар аралығындағы кезеңде іске асыруға болатынын баса айтты.
Кездесуді аяқтай келе, Қ. Тұрғанқұлов делегация мүшелері Қазақстан Республикасы Сыртқы істер министрлігі жанында аккредиттелген журналистер ретінде сайлау науқаны барысын байқауға белсене қатысатынына сенімін білдірді.

Қазақстан Республикасы
Орталық сайлау комиссиясының
баспасөз орталығы
тел. 75-21-32, 75-28-43, 75-28-44