>2011 жылғы 11 наурызда 2011 жылғы 3 сәуірге тағайындалған Қазақстан Республикасы Президентінің кезектен тыс сайлауындағы ақпараттық дауларды қарау жөніндегі Қоғамдық Кеңесінің алғашқы отырысы болды
2011 жылғы 11 наурызда 2011 жылғы 3 сәуірге тағайындалған Қазақстан Республикасы Президентінің кезектен тыс сайлауындағы ақпараттық дауларды қарау жөніндегі Қоғамдық Кеңесінің алғашқы отырысы болды.
Ақпараттық дауларды қарау жөніндегі Қоғамдық Кеңес сайлау алдындағы үгітті жүзеге асыру кезінде туындайтын ақпараттық дауларды алқалы қарау үшін құрылды және Қазақстан Республикасы Орталық сайлау комиссиясының жанындағы консультативтік-кеңесші орган болып табылады.
Қоғамдық Кеңестің негізгі міндеттері:
1) барлық сайлау процесіне қатысушылардың бұқаралық ақпарат құралдарына тең қол жеткізуін қамтамасыз етуге және сайлау алдындағы науқан барысын БАҚ-та объективті жария етуге жәрдемдесу;
2) БАҚ және олардың қызметкерлерінің сайлау процесіне қатысушылармен өзара қарым-қатынастардағы мүдделері мен заңды құқықтарын қорғау;
3) БАҚ қызметінде этика нормалары мен кәсіби принциптердің сақталуына ықпал ету, сайлау процесіне қатысушылар мен БАҚ арасындағы дауларды және өзге де жағдайларды шешуге қатысу болып табылады.
Қоғамдық Кеңестің құзыретіне сайлау процесіне қатысушылардың қызметі мен олардың сайлау науқаны уақытында сайлау заңнамасын сақтауы туралы өтініштерді қарау және олар бойынша шешімдер қабылдау кіреді. Қоғамдық Кеңестің шешімдері ұсынымдық сипатта болады.
Олар Қоғамдық Кеңестің шешімдері жұртшылықтың назарына материалдарды БАҚ-та жариялау немесе Ортсайлаукомның ресми интернет-ресурсында орналастыру арқылы жеткізіледі.
ЕҚЫҰ/ДИАҚБ мен ТМД Миссияларының байқаушылары қатысқан Қоғамдық Кеңестің алғашқы отырысында Орталық сайлау комиссиясының Байланыс және ақпарат министрлігімен бірлесіп БАҚ-тарға жүргізген мониторингінің аралық қорытындылары, сондай-ақ бұқаралық ақпарат құралдарының кандидаттардың сайлау штабтарымен іс жүзінде іс-қимыл жасауының кейбір мәселелері талқыланды.
Мониторинг нәтижелері бойынша Қоғамдық Кеңестің мүшелері қазіргі сәтте бұқаралық ақпарат құралдары жалпы кандидаттардың БАҚ-тарға тең қол жеткізуін қамтамасыз ету туралы сайлау заңнамасының талаптарын сақтауда деген қорытындыға келді. Сайлау заңнамасының бұзылуы байқалмады.
Осы мәселе бойынша кандидаттар мен олардың штабтары тарапынан шағымдар мен өтініштер келіп түскен жоқ.
«Сайлау науқаны басталғаннан бері бұқаралық ақпарат құралдарының барлығы оны жария ету процесіне, ақпарат кеңістігін кандидаттар, сайлау процесі және сайлау рәсімдері туралы материалдармен қанықтыра отырып, белсенді түрде кірісіп кетті. Осылайша, сайлаушылар қазіргі сәтте 3 сәуір күні өздерінің саналы және жан-жақты ойластырылған таңдау жасауына көмектесетін, сайлау науқанының барысы туралы толық және объективті ақпаратқа ие болды» - деп отырыс соңында Қоғамдық Кеңес Төрайымы, Қазақстан Республикасы Орталық сайлау комиссиясының мүшесі Л. Сүлеймен атап көрсетті.

Қазақстан Республикасы
Орталық сайлау комиссиясының
баспасөз орталығы
тел. 75-21-32, 75-28-43, 75-28-44