2023 жылғы 19 наурызға тағайындалған Қазақстан Республикасы 

Парламентінің Мәжілісі мен мәслихаттары депутаттарының кезектен тыс 

сайлауында мүгедектігі бар азаматтардың сайлау құқықтарын 

қамтамасыз етудің кейбір мәселелері туралы

«Қазақстан Республикасындағы сайлау туралы» 1995 жылғы  28 қыркүйектегі Қазақстан Республикасы Конституциялық заңының 12-бабының 1), 2) тармақшаларына, 48-бабының 2-1-тармағына, Қазақстан Республикасы Президентінің 1996 жылғы 11 қарашадағы № 3205 Жарлығымен бекітілген Қазақстан Республикасының Орталық сайлау комиссиясы туралы Ереженің 15-тармағының 70) тармақшасына сәйкес Қазақстан Республикасының Орталық сайлау комиссиясы ҚАУЛЫ ЕТЕДІ:

1. Мүгедектігі бар азаматтардың саяси және қоғамдық өмірге қатысуын қамтамасыз ету үшін саяси партиялар мен өзге де қоғамдық бірлестіктерге:

1) мәслихат депутаттығына кандидаттар ретінде мүгедектігі бар азаматтарды ұсыну мүмкіндігін қарастыруды;

2) мүгедектігі бар адамдар үшін жағдайларды ескере отырып, сайлау алдындағы үгіт жүргізу мүмкіндігін көздеу ұсынылады.

2. Жергілікті атқарушы органдарға:

1) дауыс беру құқығын іске асыру үшін «Сайлау учаскесінде дауыс беруге арналған үй-жайды, дауыс беру пунктін жарақтандыру жөніндегі нұсқаулықты бекіту туралы» Қазақстан Республикасы Орталық сайлау комиссиясының 2012 жылғы 23 қазандағы № 21/183 және «Қазақстан Республикасында сайлау өткізу кезінде мүмкіндіктері шектеулі азаматтардың сайлау құқықтарын қамтамасыз ету жөніндегі ұсынымдар туралы» 2018 жылғы 21 желтоқсандағы № 24/217 қаулыларына сәйкес сайлау учаскелерінде мүгедектігі бар адамдарға жағдайларды қамтамасыз ету бойынша қажетті шараларды қабылдасын;

2) мүгедектігі бар адамдар болып табылатын сайлаушылардың дауыс беруі үшін жағдайларды қамтамасыз ету жөніндегі жұмыста сайлау комиссияларына жәрдем көрсетсін;

3) мүгедектігі бар адамдардың қоғамдық бірлестіктер өкілдерінің сарапшы ретінде қатысуымен мүгедектігі бар адамдардың дауыс беруі үшін учаскелердің қолжетімділігіне тексеру жүргізсін;

 4) мүгедектігі бар (соқыр және нашар көретін, саңырау, соқыр - саңырау, тірек-қимыл аппаратының функциялары бұзылған) сайлаушылардың дауыс беруге арналған учаскелерде ерекше жағдайларды қамтамасыз етудің қосымша шараларын көздесін.

3. Қазақстан Республикасының Еңбек және халықты әлеуметтік қорғау министрлігі жергілікті атқарушы органдармен бірлесіп, дауыс беру кезінде ерекше жағдайлар қажет ететін мүгедектігі бар сайлаушылар туралы мәліметтерді; Қолжетімділіктің интерактивті картасында сайлау учаскелері туралы мәліметтерді өзектендірсін.

4. Облыстардың, республикалық маңызы бар қалалардың және астананың, аудандардың, қалалардың аумақтық сайлау комиссиялары өкілеттіктеріне сәйкес мүгедектігі бар адамдардың дауыс беруі үшін жағдайларды қамтамасыз ету жөнінде қажетті шаралар қабылдасын.

5. Осы қаулы Орталық сайлау комиссиясының интернет-ресурсында жариялансын.

6. Осы қаулының орындалуын бақылау Қазақстан Республикасы Орталық сайлау комиссиясының мүшесі А. Г. Щегорцоваға жүктелсін.

 Астана қаласы,

2023 жылғы 27 қаңтар,

№ 27/700