2011 жылғы 8 желтоқсанда Қазақстан Республикасының Орталық сайлау комиссиясы «Ақ жол» Демократиялық партиясының партиялық тізімін тіркеді
2011 жылғы 8 желтоқсанда Орталық сайлау комиссиясы «Ақ жол» Демократиялық партиясының, Қазақстан Республикасы Парламенті Мәжілісінің депутаттығына 63 кандидатты қамтитын партиялық тізімін тіркеді.
«Ақ жол» Демократиялық партиясынан тіркелген кандидаттардың арасында төрт ұлттың өкілдері бар. 15%-ке жуығы - әйелдер.
Партиялық тізімге енгізілгендердің жартысына жуығы 55 жасқа дейінгі азаматтар. Олардың ең жасы 26 жаста.
Барлық кандидаттардың жоғары білімі бар. 35%-ке жуығының білімі заңгерлік не экономистік. 25% -тен астамы түрлі халық шаруашылығы салаларының мамандары.
«Ақ жол» Демократиялық партиясынан ұсынылған үміткерлердің жартысынан көбі коммерциялық құрылымдардың қызметкерлері болып табылады.
Сондай-ақ, тізімде ғылым, мәдениет, білім саласының және мемлекеттік органдар мен мекемелердің қызметкерлері бар.
Соңғы тәулікте мәслихаттар депутаттығына кандидаттар ұсыну айтарлықтай белсенді жүргізілді.
Орталық сайлау комиссиясына түсіп жатқан мәліметтерге сәйкес, 2011 жылғы 8 желтоқсандағы жағдай бойынша мәслихаттар депутаттығына 3056 үміткер ұсынылған.
Олардың ішінде облыстық мәслихаттарға – 300, соның ішінде Астана қаласының мәслихатына – 25 және Алматы қаласының мәслихатына – 37 кандидат, аудандық мәслихаттарға – 2252, қалалық мәслихаттарға – 504 кандидат.
Ұсынылған кандидаттардың 830-ы – «Нұр Отан» Халықтық Демократиялық партиясының, 17-і – Коммунистік Халық партиясының; 12-і – Қазақстанның «Ақ жол» Демократиялық партиясының, 7-і – Қазақстанның социал-демократиялық «Ауыл» партиясының; 3-і – Қазақстан Патриоттары партиясының және 1-і – Жалпыұлттық социал-демократиялық партияның мүшесі.
812 үміткер өздерінің партияға қатыстылығын көрсетпеген, 1374-і – партияда жоқтар.
Қазіргі сәтке дейін мәслихаттар депутаттығына 39 кандидат тіркелген.

Қазақстан Республикасы
Орталық сайлау комиссиясының
баспасөз орталығы
тел. 75-21-32, 75-28-43, 75-28-44