Қазақстан Республикасы Парламенті Мәжілісінің және мәслихаттарының депутаттарын сайлау жөніндегі сайлау бюллетеньдерінің мәтіндеріне өзгерістер енгізу рәсімі туралы
«Қазақстан Республикасындағы сайлау туралы» Қазақстан Республикасы Конституциялық заңының 12-бабына, 89-бабы 6-тармағының 4) тармақшасына және 105-бабына сәйкес Қазақстан Республикасы Орталық сайлау комиссиясы ҚАУЛЫ ЕТЕДІ:
1. Парламент Мәжілісінің депутаттарын сайлау жөнінде дауыс беруге арналған сайлау бюллетенінен саяси партияның атауын алып тастау, «Қазақстан Республикасындағы сайлау туралы» Қазақстан Республикасының Конституциялық заңында белгіленген жағдайларда, Орталық сайлау комиссиясының шешімімен жүргізіледі.
2. Мәслихат депутаттығына кандидаттың тегін, атын және әкесінің атын сайлау бюллетенінен алып тастау, егер «Қазақстан Республикасындағы сайлау туралы» Қазақстан Республикасының Конституциялық заңында белгіленген тәртіппен кандидат өз кандидатурасын қайтып алса немесе республикалық немесе жергiлiктi қоғамдық бiрлестiктiң, қоғамдық бiрлестiктiң құрылымдық бөлiмшесiнің жоғары органы мәслихат депутаттығына кандидат ұсыну туралы өз шешiмiнiң күшiн жойса немесе кандидатты тіркеудің күшін жою туралы шешім қабылданса, тиісті округтік сайлау комиссиясының шешімінен жүргізіледі.
3. Қабылданған шешім туралы тиісті аумақтық және учаскелік сайлау комиссиялары хабардар етіледі.
4. Өзгерістер енгізуді учаскелік сайлау комиссиялары мынадай тәртіппен жүргізеді: комиссия мүшесі бірыңғай тәсілмен саяси партияның атауын не кандидаттың тегін, атын, әкесінің атын және олардың оң жағында орналасқан шаршыны сиямен сызып тастайды және сызылып тасталған саяси партия атауының не кандидат тегінің, атының, әкесі атының және шаршының оң жағынан өз қолын қояды.

5. Осы қаулы облыстық, Астана және Алматы қалалық сайлау комиссияларына жіберілсін.
6. Облыстық, Астана және Алматы қалалық сайлау комиссиялары осы қаулыны төмен тұрған сайлау комиссияларының назарына жеткізсін.
7. Осы қаулының орындалуын бақылау Қазақстан Республикасы Орталық сайлау комиссиясының хатшысы Б.С. Мелдешовке жүктелсін.

Қазақстан Республикасы
Орталық сайлау комиссиясының
Төрағасы
Қ. Тұрғанқұлов

Қазақстан Республикасы
Орталық сайлау комиссиясының
хатшысы
Б. Мелдешов

Астана, 2011 жылғы 30 желтоқсан
№ 78/146