2022 жылғы 5 маусымға тағайындалған республикалық референдумда бұқаралық ақпарат құралдарының өкілдерін аккредиттеу туралы

«Республикалық референдум туралы» Қазақстан Республикасының 1995 жылғы 2 қарашадағы Конституциялық Заңының 6-бабының 5-тармағына сәйкес Орталық референдум комиссиясы ҚАУЛЫ ЕТЕДІ:

1. Бұқаралық ақпарат құралдары референдумға әзірлік пен оны өткізу барысын жария етіп отырады, олардың референдум комиссиялары жанында тіркелген өкілдерінің референдум өткізуге байланысты шараларға баруына кепілдік беріледі.

2. Бұқаралық ақпарат құралдарының өкілдері «Республикалық референдум туралы» 1995 жылғы 2 қарашадағы Қазақстан Республикасының Конституциялық заңында, «Бұқаралық ақпарат құралдары туралы» 1999 жылғы 23 шілдедегі Қазақстан Республикасының Заңында көзделген құқықтар мен міндеттерге ие болады.

3. Бұқаралық ақпарат құралдарының өкілдерін аккредиттеу Қазақстан Республикасы Мәдениет және ақпарат министрінің 2013 жылғы 21 маусымдағы № 138 бұйрығымен бекітілген Журналистерді аккредиттеу қағидаларының (бұдан әрі – Қағидалар) 6, 7, 8-тармақтарына сәйкес жүзеге асырылады.

4. Референдум комиссиялары Қағидалардың 11-тармағында көзделген негіздер бойынша бұқаралық ақпарат құралдарының өкілдерін аккредиттеуден бас тартуға құқылы.

5. Референдум комиссиялары бұқаралық ақпарат құралдарының өкілдерін тіркеу кезінде осы қаулыны басшылыққа алсын.

6. Осы қаулы Орталық референдум комиссиясының интернет-ресурсында жариялансын.

Нұр-Сұлтан қаласы,

2022 жылғы 6 мамыр,

№ 32/484