«Қазақстан Республикасындағы сайлау туралы» Қазақстан Республикасының 1995 жылғы 28 қыркүйектегі Конституциялық заңының 12 және 41-баптарына, «Әскери қызметшілер мен олардың отбасы мүшелерінің мәртебесі және оларды әлеуметтік қорғау туралы» Қазақстан Республикасының 1993 жылғы 20 қаңтардағы Заңының 1-бабына, Қазақстан Республикасы Үкіметінің 2000 жылғы 12 шілдедегі № 1063 қаулысымен бекітілген Қазақстан Республикасының халқын құжаттандыру және тіркеу Ережесіне, Қазақстан Республикасы Үкіметінің 2003 жылғы 12 қыркүйектегі № 925 қаулысымен бекітілген Әскери міндеттілер мен шақырылушыларды әскери есепке алу Ережесіне сәйкес, Қазақстан Республикасы азаматтарының жалпыға ортақ белсенді сайлау құқығын іске асыру мақсатында Қазақстан Республикасы Орталық сайлау комиссиясы ҚАУЛЫ ЕТЕДІ:

1. 2005 жылғы 4 желтоқсанға хабарланған Қазақстан Республикасының Президентін сайлауда сайлаушылардың тізімдерінің негізінде олар сайлаушының жеке басын куәландыратын мынадай құжаттарды, атап айтқанда: Қазақстан Республикасы азаматының жеке куәлігін, уақытша жеке куәлігін немесе төлқұжатын, сондай-ақ шақыру бойынша әскери қызметін өткеріп жүрген әскери қызметшілер әскери билетін көрсеткен кезде сайлаушыларға сайлау бюллетеньдері берілуге тиіс болып белгіленсін.
2. Осы қаулы облыстық, Астана және Алматы қалалық сайлау комиссияларына жіберілсін.
3. Облыстық, Астана және Алматы қалалық сайлау комиссиялары осы қаулыны төмен тұрған аумақтық, сондай-ақ учаскелік сайлау комиссияларының назарына жеткізсін.
4. Осы қаулы бұқаралық ақпарат құралдарында жариялансын.

Төраға О. Жұмабеков

Астана, 2005 жылғы 26 қараша
№47/96