Қазақстан Республикасының тоғыз аймағында аудандық маңызы бар қалалары, ауылдық округтері, ауылдық округтің құрамына кірмейтін кенттері мен ауылдары әкімдерін сайлау өтті.

Аумақтық сайлау комиссияларының мәліметтеріне сәйкес, Ақмола облысы бойынша 136 ауылдық округ әкімі, Ақтөбе облысында – 77, Алматы облысында – 129, Шығыс Қазақстан облысында – 131, Батыс Қазақстан облысында – 95, Қарағанды облысында – 129, Қызылорда облысында – 72, Маңғыстау облысында – 26, Солтүстік Қазақстан облысында облысында 138 әкім сайланды.

Атырау, Жамбыл, Қостанай, Павлодар облыстарындағы ауыл әкімдерін сайлау алдағы апта ішінде өтсе, Оңтүстік Қазақстан облысында сайлау 24 тамыз күні аяқталады.

Ауыл әкімдерін сайлау кезіндегі дауыс беру, дауыстарды санау және қорытынды шығару рәсімдері сайлау туралы заңнамаға сәйкес өтуде.

Еске салай кетейік, елімізде аудандық маңызы бар қалалары, ауылдық округтері, ауылдық округтің құрамына кірмейтін кенттері мен ауылдары әкімдерін сайлау 4 тамызда басталған болатын. Сайлау тиісті аудан (облыстық маңызы бар қала) мәслихаты депутаттары – таңдаушылардың отырысында өткізіледі. 24 тамызға дейін жалғасатын сайлау нәтижесінде республика бойынша барлығы 1 413 әкім сайланатын болады.