Ортсайлауком ҚР Парламенті Мәжілісінің депутаты

Н.Т. Байтілесовті тіркеді

2024 жылғы 4 наурыздағы Нұрлан Әбдіровтің төрағалығымен Қазақстан Республикасы Орталық сайлау комиссиясының отырысы өтіп, «Қазақстан Республикасы Парламенті Мәжілісінің депутаты Н.Т. Байтілесовті тіркеу туралы» қаулы қабылданды. 

«Қазақстан Республикасындағы сайлау туралы» 1995 жылғы 28 қыркүйектегі Қазақстан Республикасы Конституциялық заңының 12, 45, 46-баптарына, 97-1-бабының 6-тармағына, 98-бабына сәйкес және «AMANAT» партиясы» қоғамдық бірлестігінің Саяси кеңесі Бюросының 2024 жылғы 4 наурыздағы қаулысынан үзінді көшірмеге сәйкес Қазақстан Республикасының Орталық сайлау комиссиясы қаулы етті:

1. Қазақстан Республикасы Парламенті Мәжілісі депутатының бос мандаты «AMANAT» партиясы» қоғамдық бірлестігінің мүшесі Нұрсұлтан Төленұлы Байтілесовке берілсін.

2. Нұрсұлтан Төленұлы Байтілесов Қазақстан Республикасы Парламенті Мәжілісінің депутаты болып тіркелсін.

3. Нұрсұлтан Төленұлы Байтілесовке белгіленген үлгідегі тиісті куәлік пен омырауға тағатын белгі тапсырылсын.

Отырыс барысында ОСК Төрағасы Нұрлан Әбдіров «Қазақстан Республикасының Парламенті және оның депутаттарының мәртебесі туралы» Конституциялық Заңның 24-бабына сәйкес депутаттың өкілеттігі оны Орталық сайлау комиссиясы тіркеген кезден басталатынын хабарлады.

Нұрлан Әбдіров Нұрсұлтан Төленұлына белгіленген үлгідегі куәлік пен омырауға тағатын белгіні табыстап, ол Президенттік жастар кадр резервінің өкілі болып табылатынын атап өтіп, оған депутаттық корпустағы жұмысына сәттілік тіледі.