23.02.2024 |
2024 жылы 20-21 ақпанда ҚР ОСК аумақтық сайлау
комиссияларының жаңадан сайланған мүшелері үшін кезекті оқыту
семинарын өткізді
Қазақстан Республикасы Президентінің жанындағы Мемлекеттік басқару академиясының Электоралдық оқыту орталығы базасында Қазақстан Республикасының Орталық сайлау комиссиясы ұйымдастырған семинарға республиканың 17 өңірінен жаңадан сайланған 53 аудандық және қалалық АСК төрағалары қатысты. Оқыту курсының тақырыбы: «Қазақстан Республикасында сайлау процесін ұйымдастырудың теориялық және практикалық негіздері».
Семинарды Қазақстан Республикасы Орталық сайлау комиссиясының мүшесі Сәбила Мұстафина ашып, өзінің құттықтау сөзінде тыңдаушыларға оқыту курсының мақсаты мен міндеттерін жеткізді және қазіргі заманғы сайлаудағы аумақтық сайлау комиссияларының рөлін ашып берді.
Орталық сайлау комиссиясы аппаратының бөлім меңгерушілері С.Қозыбаева, Е.Қарабалаев, А.Тәжиева, Г.Кембаева, Б.Тұрғанбаев, Д.Қабиева оқу курсының негізгі баяндамашылары болды. Баяндамашылар өз сөзінде тыңдаушыларға сайлау құқығы мен сайлау процесі ұғымдарын, қазіргі кезеңде сайлау комиссияларының қызметін ұйымдастырудың негізгі бағыттарын, сайлау заңнамасын бұзғаны үшін заңды жауапкершілікті, байқаушылардың құқықтары мен міндеттерін түсіндірді.
Сондай-ақ семинарға қатысушыларға Қазақстан Республикасындағы сайлау процесіне қатысушылар үшін электоралдық оқытуды ұйымдастыру, сайлауды мемлекеттік және мемлекеттік емес қаржыландыру нысандары, Қазақстан Республикасындағы сайлауды халықаралық байқау туралы ақпарат берілді, сайлау барысында халықаралық миссиялар анықтаған негізгі ескертулер талқыланды.
Оқыту курсы аясында тренинг форматында тыңдаушылармен сайлауға дайындық кезеңіндегі, дауыс беру күні, дауыстарды санау және дауыс беру нәтижелерін белгілеу кезінде сайлау комиссиясының жұмыс дағдылары пысықталды.
Сондай-ақ саяси партиялармен, байқаушылармен, масс-медиа өкілдерімен, үкіметтік емес ұйымдармен және сайлау процесінің басқа да қатысушыларымен өзара іс-қимыл дағдылары, шешендік өнер, уақыт пен стрессті басқару әдістері талқыланды.
Оқу курсын аяқтаған соң барлық семинарға қатысушылар тиісті сертификаттарын алды.