ҚР ОСК өкілдері Әзірбайжандағы сайлауды байқауға қатысты

Ортсайлаукомның Төрағасы Нұрлан Әбдіров бастаған қазақстандық делегация Әзірбайжан Орталық сайлау комиссиясының шақыруымен 2024 жылғы 7 ақпанда өткен Әзірбайжан Республикасы Президентінің кезектен тыс сайлауын халықаралық байқауға қатысты.

Естеріңізге сала кетейік, сайлау алғаш рет елдің барлық аумағында өтті. Әзірбайжан ОСК мәліметтері бойынша сайлаушылардың сайлауға қатысуы 76,4% құрады. Сайлауға қатысу үшін барлығы 7 кандидат тіркелді. Сайлау қорытындылары бойынша Ильхам Әлиев жеңімпаз атанды - оған учаскелерге келген сайлаушылардың 92,12% дауыс берді.

Сайлауды байқауға Әзірбайжан Республикасы, ТМД, ШЫҰ, ТМҰ, ЕҚЫҰ ДИАҚБ басшылығының шақыруы бойынша Қазақстан Республикасының 36 өкілі қатысты (ҚР СІМ-нің 10 өкілі және ҚР ОСК-ның 2 өкілі - қысқа мерзімді байқаушылар, 1 ұзақ мерзімді байқаушы). Жалпы, өз қызметін 790 шетелдік байқаушы жүзеге асырды.

5 ақпанда Нұрлан Әбдіров Әзірбайжан Республикасының ОСК Төрағасы Мазахир Панаховпен кездесті. Кездесу барысында Қазақстанның ОСК Басшысы әріптесіне байқауға қатысуға шақырғаны үшін ризашылығын білдіріп, сайлау учаскелеріне бармай-ақ күні бойы дауыс беруді үздіксіз байқауға мүмкіндік беретін Интернетке шығатын веб-камераларды пайдалану тәжірибесіне қызығушылық білдірді. Сондай-ақ Қазақстан ОСК басшысы әріптесіне өткен жылдың желтоқсан айында ҚР ОСК-ның 30 жылдығына арналған ведомстволық медалін табыс етті.

Әзірбайжан ОСК басшысы өз кезегінде ҚР делегациясын алдағы сайлауды өткізуге дайындықтың негізгі кезеңдері туралы хабардар етті және біздің елдеріміздің сайлау органдарының ынтымақтастығын одан әрі дамытуға мүдделілігін білдірді.

Содан кейін Қазақстанның Ортсайлауком басшысы Құрметті жерлеу аллеясында Гейдар Әлиев мемориалына гүл шоқтарын қою рәсіміне қатысты.

Сондай-ақ Нұрлан Әбдіровтің бастамасымен Бакуде 5 ақпанда Әзірбайжандағы сайлауды байқау жөніндегі ЕҚЫҰ/ДИАҚБ Миссиясының Басшысы Оуэн Мерфимен кездесу өтті. Кездесу аясында тараптар одан әрі ынтымақтастық перспективаларын және Қазақстан өкілдерінің Еуропа мен АҚШ елдеріндегі сайлауды байқау мүмкіндігін талқылады.

Сайлау күні 7 ақпанда Төраға бастаған ҚР ОСК өкілдері Бакудегі бірқатар сайлау учаскелеріне барып, учаскелерді ашу, дауыс беру, дауыстар санау және сайлау нәтижелерін шығару процесін байқады.

Қазақстан, Өзбекстан, Әзірбайжан және Түркия орталық сайлау органдарының басшылары бірлескен кездесу өткізіп, оның барысында өзара іс-қимыл туралы пікір алмасты, сондай-ақ ҚР Президенті Қасым-Жомарт Тоқаевтың ТМҰ-ға мүше елдердің орталық сайлау органдарының Консультативтік кеңесін құру туралы бастамасының маңыздылығы мен өзектілігін растап, оны іс жүзінде іске асыруға дайын екендіктерін білдірді.

Айта кетейік, Қызылорда облысы аумақтық сайлау комиссиясының төрағасы Әділбек Ерсұлтанов жақында ғана әскери іс-қимылдар өрбіген Шуша және Ханкенді қалаларында сайлауды байқады.

Жалпы, Әзірбайжандағы сайлау жақсы ұйымдастырушылық деңгейде және ұлттық сайлау заңнамасын сақтай отырып өтті.