23.11.2023 |
Нұрлан Әбдіров «Қазақстан-Армения»
достық тобының мүшелерімен кездесті
ОСК Төрағасы Нұрлан Әбдіров Армения Республикасы Ұлттық Жиналысының «Қазақстан – Армения» достық тобының мүшелерімен кездесу өткізді.
АР Ұлттық Жиналысының өңірлік мәселелер және Еуразиялық интеграция мәселелері жөніндегі тұрақты комиссиясы төрағасының орынбасары Вагаршак Акобян, Армения Республикасының Қазақстандағы Төтенше және Өкілетті Елшісі Армен Гевондян, АР Ұлттық Жиналысының есеп комиссиясының төрағасы Нарек Бабаяннан құралған делегация ОСК-ға 2023 жылғы 22 қарашада келді. Іс-шараға ОСК хатшысы Мұхтар Ерман қатысты.
Кездесуді аша отырып, Орталық сайлау комиссиясының басшысы Қазақстан мен Арменияның заң шығарушы органдар, Орталық сайлау органдары арасында да екіжақты ынтымақтастықтың жоғары деңгейін атап өтті. Ол армян әріптестеріне Қазақстандағы сайлау мен референдумды байқауға үнемі белсенді қатысқаны үшін алғысын білдірді.
Нұрлан Әбдіров сондай-ақ қонақтарды 2023 жылғы 8 желтоқсанда Қазақстан Республикасы Орталық сайлау комиссиясының құрылуының 30 жылдығы және «Конституциялық реформа және сайлау жүйесі» тақырыбында жоспарланған мерейтойлық халықаралық ғылыми-практикалық конференция туралы хабардар етті. Оған Армения Орталық сайлау комиссиясының төрағасы Ваагн Овакимян қатысады.
Конференция барысында Қазақстан Республикасы мен Армения Республикасының Орталық сайлау комиссиялары арасында өзара түсіністік туралы Меморандумға қол қою жоспарлануда.
Конференция жұмысына шет елдердің бірқатар орталық сайлау органдарының, халықаралық ұйымдардың басшылары, Қазақстан институционалдық мүше болып табылатын сайлауды ұйымдастырушылардың халықаралық қауымдастықтарының өкілдері, электоралдық саладағы белгілі ғалымдар мен сарапшылар қатысады деп күтілуде.