11.10.2023 |
Нұрлан Әбдіров Венгрияның Төтенше және Өкілетті Елшісімен
кездесу өткізді
2023 жылғы 11 қазанда ҚР Орталық сайлау комиссиясының Төрағасы Нұрлан Әбдіров Венгрияның Қазақстан Республикасындағы Төтенше және Өкілетті Елшісі Отто Иван Ронаны қабылдады.
Кездесу барысында Нұрлан Әбдіров Қазақстан мен Венгрияның арасындағы, сондай-ақ елдердің орталық сайлау комиссиялары арасындағы тығыз және нәтижелі қарым-қатынастарды атап өтті.
Сондай-ақ, тараптар екі мемлекеттің сайлау органдарының одан әрі ынтымақтастығының перспективалары туралы пікір алмасты және Қазақстан мен Венгрияның cайлау органдары арасындағы өзара түсіністік туралы меморандумға қол қою мүмкіндігін талқылады.
Нұрлан Әбдіров Отто Иван Ронаны қазіргі уақытта ағымдағы жылдың 5 қарашасына тағайындалған 45 пилоттық аудандар мен облыстық маңызы бар қалаларда әкімдерді сайлау жөніндегі сайлау науқаны өтіп жатқаны туралы хабардар етті. ОСК Төрағасы атап өткендей, бұл сайлаудың ерекшелігі - алғаш рет аумақ тұрғындары өз әкімдерін тікелей сайлайтын болады.
Сонымен қатар, Қазақстанда аралас сайлау жүйесінің енгізілуіне байланысты, 21 сайлау округінде ағымдағы жылдың 29 қазанында шығып қалған мәслихат депутаттарының орнына сайлау өтеді.
Кездесуді қорытындылай келе, Нұрлан Әбдіров бұл олардың Елші Отто Иван Ронамен алғашқы жеке кездесуі екенін атап өтіп, 2022 жылғы 20 қарашадағы Қазақстан Республикасы Президентінің кезектен тыс сайлауын және 2023 жылғы 19 наурыздағы Қазақстан Республикасы Парламенті Мәжілісі депутаттарының кезектен тыс сайлауын қадағалауға өзінің жеке қатысқаны үшін ризашылығын білдірді.