Н.С. Әуесбаевты Қазақстан Республикасының Президенттігіне кандидат 

ретінде тіркеу мәселесі бойынша Ортсайлауком отырысы өтті

2022 жылғы 20 қазанда Нұрлан Әбдіровтің төрағалығымен Нұрлан Сатыбалдыұлы Әуесбаевты Қазақстан Республикасының Президенттігіне кандидат ретінде тіркеу мәселесі бойынша Орталық сайлау комиссиясының отырысы өтті. 

Күн тәртібіндегі мәселе бойынша Ортсайлауком мүшесі Сәбила Мұстафина баяндама жасады. Ол 2022 жылғы 7 қазанында Орталық сайлау комиссиясына «Жалпыұлттық социал-демократиялық партия» республикалық қоғамдық бірлестігі Н.С. Әуесбаевты Қазақстан Республикасының Президенттігіне кандидат етіп ұсыну туралы құжаттарды ұсынғанын хабарлады. Орталық сайлау комиссиясына кандидатты тіркеу үшін мынадай құжаттар ұсынылды: 

- Президенттікке кандидат Н.С. Әуесбаевтың және оның зайыбының активтер мен міндеттемелер жөнінде декларация тапсырғаны туралы мемлекеттік кірістер органының анықтамасы; 

- Президенттікке кандидат Н.С. Әуесбаевтың оны тіркеуге кедергі келтіретін аурулардың жоқтығы туралы медициналық қорытындысы; 

- облыстардың, республикалық маңызы бар қалалардың және Қазақстан Республикасы астанасының аумақтық сайлау комиссияларының Президенттікке кандидат Н.С. Әуесбаевты қолдап жиналған азаматтардың қолдарын тексеру нәтижелері туралы хаттамалары.

Осы хаттамаларға сәйкес Президенттікке кандидат Н.С. Әуесбаевтың қолдауына Қазақстанның 15 өңірінен 120 908 азаматтың қолдары жиналды.  Тексеру нәтижесінде 119 197-і рас деп танылды, яғни қажетті саны қамтамасыз етілді, бұл сайлаушылардың жалпы санының кемінде 1% немесе 118 273-і. 

Н.С. Әуесбаевты Президенттікке кандидат ретінде тіркеуге қажетті барлық құжаттар Орталық сайлау комиссиясына ұсынылды және оларға қойылатын талаптарға толық сәйкес келеді. 

ҚР ОСК қаулысымен Нұрлан Сатыбалдыұлы Әуесбаев 2022 жылғы 20 қарашаға тағайындалған Қазақстан Республикасының Президентінің кезектен тыс сайлауында Қазақстан Республикасының Президенттігіне кандидат болып тіркелді, оған тиісті куәлік берілді. 

Орталық сайлау комиссиясы отырысының қорытындылары бойынша бұқаралық ақпарат құралдары өкілдерінің қатысуымен Н.С. Әуесбаевтың брифингі өтті.