2005 жылғы 10 қарашада Қазақстан Республикасы Орталық сайлау комиссиясының төрағасы Оңалсын Жұмабеков дипломатиялық миссиялардың басшыларына, шетелдік бұқаралық ақпарат құралдарының, саяси партиялардың өкілдеріне және шетелдік байқаушылар үшін «Сайлау» автоматтандырылған ақпараттық жүйесінің тұсау кесер рәсімін өткізді.
Оңалсын Жұмабеков «Сайлау» автоматтандырылған ақпараттық жүйесі концепциясының негізін сайлауға дайындық және өткізу барысында пайдаланылатын ақпараттардың тиімділік пен сенімділік процесін қамтамасыз ету, ақпараттарды өңдеу, жинақтау, сақтау, іздеу және тарату құрайды» деп атап көрсетті.
Сондай-ақ ол «Сайлау» автоматтандырылған ақпараттық жүйесін дайындау жұмысы басталмас бұрын әлемнің бірқатар мемлекеттерінің тәжірибесі зерттелгенін хабарлады. Электрондық дауыс беру жүйесін кезеңмен енгізу туралы ЕҚЫҰ/ДИАҚБ тарапынан айтылған ұсыныстар ескерілген. Осыған байланысты, Қазақстан Республикасы Президентін сайлауда электрондық дауыс беру жүйесі 1447 сайлау учаскелерінде қолданысқа енгізілетін болады, бұл еліміз бойынша сайлау учаскелерінің 15,03% құрайды. Сайлаушылардың 31,8 % электронды дауыс беру жүйесін пайдалану мүмкіндігін иеленеді.
Оңалсын Жұмабеков әрбір сайлаушыға қағаз бюллетеньмен немесе электрондық жүйемен дауыс беруге таңдау еркі берілетінін атап айтты.
«Алдағы болатын Қазақстан Республикасы Президентін сайлауға сайлаушылардың, саяси партиялардың, халықаралық және қазақстандық үкіметтік емес ұйымдардың ұсыныстары ескеріп, қазақстандық мамандар электрондық дауыс беру жүйесінің жетілдірілген нұсқасын ұсынды» деп сөзін қортындылады Оңалсын Жұмабеков.