ҚР ОСК Төрағасы Б. Имашев Украинаның ОСК-ның шақыруымен 2019 жылғы 31 наурызда Украина Президентінің сайлауын байқауға қатысты

Қазақстан Республикасы Орталық сайлау комиссиясының Төрағасы Берік Имашев Украинаның Орталық сайлау комиссиясының шақыруы бойынша Украина Президентінің сайлауын байқауға қатысты.

2019 жылдың 30 наурызында Берік Имашев Украинаның Орталық сайлау комиссиясының Төрайымы Татьяна Слипачукпен кездесті. Кездесу барысында Украина Орталық сайлау комиссиясының басшысы халықаралық байқаушыларға ағымдағы сайлау науқанының негізгі кезеңдері, сайлауды дайындау және өткізу, осы сайлаудың ерекшеліктері туралы хабардар етті.

2019 жылғы 31 наурыздағы сайлау күні ҚР Орталық сайлау комиссиясының өкілдері сайлау учаскесінің ашылуын, дауыс беру процесін, дауыстарды санауды және сайлау қорытындыларын шығаруды бақылау үшін Украина астанасында бірқатар сайлау учаскелерін аралады.

2019 жылғы 1 сәуірде Орталық сайлау комиссиясының басшысы Берік Имашев Украинаның Орталық сайлау комиссиясының алғашқы сайлау қорытындылары бойынша баспасөз конференциясына қатысты.

Жалпы қазақстандық делегация өкілдері сайлауды ұйымдастырудың жоғары деңгейін, сондай-ақ сайлау комиссияларының үйлесімді жұмысын атап өтті.

Жоғарыда аталған сайлауды байқауға Қазақстан Республикасының 11 өкілі қатысты, олардың екеуі - Украина Орталық сайлау комиссиясының шақыруымен, ЕҚЫҰ/ДИАҚБ-ның байқаушылар құрамында - алты адам және ЕҚЫҰ ПА делегациясының құрамында - үш адам.