26.01.2019 |
2019 жылғы 24-25 қаңтарда Нью-Дели қ. Қазақстан Республикасы Орталық сайлау комиссиясының Төрағасы Берік Имашев Халықаралық конференцияға және Үндістанның 9-шы Ұлттық сайлаушылар күнін мерекелеуіне қатысты
2019 жылдың 24 қаңтарында Ортсайлауком делегациясы Берік Имашевтың төрағалығымен Нью-Дели қаласында (Үндістан Республикасы) «Сайлауымызды инклюзивті және қолжетімді етеміз» тақырыбындағы халықаралық конференцияға қатысты.
Халықаралық конференцияның жұмысына Мальдив, Бутан, Бангладеш, Үндістан, Қазақстан, Ауғанстан, Непал, Ресей, Шри-Ланка сайлау комиссияларының басшылары мен өкілдері және Халықаралық демократия және сайлауға көмек көрсету институтының өкілдері қатысты.
Біркүндік конференция барысында сайлау органдары мен халықаралық ұйымдардың басшылары мен делегациялары өкілдері өздерінің презентацияларын ұсынды әрі инклюзивті және қолжетімді дауыс беруді қамтамасыз етуге бағытталған өздерінің тәжірибелері мен бастамалары туралы айтып берді.
Қазақстандық тарап әріптестеріне 2015 жылы ратификациялаған Мүмкіндектері шектеулі азаматтардың құқықтары туралы БҰҰ Конвенциясын жүзеге асыру бойынша қабылданған практикалық шаралар туралы айтып берді. Өздеріңіз білетіндей, Қазақстан мүгедектерді әлеуметтік қорғауға ғана емес, сонымен қатар теңдік және кемсітпеушілік қағидаттарына негізделген жеке құқықтарды қамтамасыз етуге назар аударады. Осылайша, 2018 жылы Қазақстандағы сайлау туралы заңнамаға ерекше қажеттіліктері бар адамдар үшін қолжетімді дауыс беруді қамтамасыз етудің ерекше жағдайларын жасауға бағытталған түзетулер енгізілді.
Халықаралық конференция Үндістанда жыл сайын 25 қаңтарда атап өтілетін Ұлттық сайлаушылар күніне арналды. Ұлттық дауыс беру күні мерекесі Макеншоу орталығында Үндістан Президентінің, шетелдік делегациялардың, дипломатиялық миссиялардың, Үндістан қоғамы өкілдерінің қатысуымен өткізілді. Мереке Үндістан Үкіметі тарапынан жас сайлаушылардың азаматтық белсенділігін арттыру және оларды саяси үдеріске тарту мақсатында 2011 жылы бекітілді.
Сол күні шетелдік делегация өкілдері Үндістанның Сайлау комиссиясы жанындағы Демократия және сайлауды қолдау халықаралық институтының жаңа оқу корпусына барды.
Осы іс-шараларға қазақстандық делегацияның қатысуы Қазақстан мен Үндістанның Орталық сайлау комиссияларының екіжақты ынтымақтастығының белсенді жалғасы болды.