29.08.2018 |
2018 жылғы 5 қазанда Шымкент қаласынан Қазақстан Республикасы Парламенті Сенатының депутаттарын сайлау өтеді
«Шымкент қаласынан Қазақстан Республикасы Парламенті Сенаты депутаттарының сайлауын 2018 жылғы 5 қазанға тағайындау туралы» Қазақстан Республикасы Президентінің 2018 жылғы 9 тамыздағы № 731 Жарлығы негізінде Орталық сайлау комиссиясы Шымкент қаласынан Қазақстан Республикасы Парламенті Сенатының депутаттарын сайлауды әзірлеу мен өткізу жөніндегі негізгі іс-шаралардың күнтізбелік жоспарын бекітті.
Сайлау науқаны келесі кезеңдерінің мерзімдері айқындады:
Кандидаттарды ұсыну 11 тамызда басталады, тіркеу ағымдағы жылдың 4 қыркүйегінде 18 сағатта (сайлау күніне бір ай қалғанда) аяқталады.
Кандидаттарды тіркеу барлық қажетті құжаттарды алғаннан кейін басталады және сайлау күніне дейін жиырма күн бұрын - 14 қыркүйек 18 сағатта аяқталады.
Сайлау алдындағы үгіт кандидаттарды тіркеу аяқталған мерзімнен басталып, сайлау болатын күннің алдындағы күнгі жергілікті уақыт бойынша нөл сағатта аяқталады - 15 қыркүйектен 3 қазанға дейін қоса алғанда.
2018 жылғы 28 тамыздағы жағдай бойынша 9 кандидат ұсынылды, олардың 8-і тіркелген:
Алданов Серік Ысмайылұлы, 1983 жылы туылған, «Банк ЦентрКредит» АҚ Шымкент қ. филиалының қызметін қолдау басқармасының бастығы;
Бекназаров Нұрлан Құдиярұлы, 1964 жылы туылған, Шымкент қаласы мәслихатының хатшысы;
Доронин Владимир Анатольевич, 1964 жылы туылған, уақытша жұмыссыз;
Жылкелдиев Бижан Мергенбайұлы, 1984 жылы туылған, «Global A» ЖШС директоры;
Қарабеков Ғани Әжединұлы, 1968 жылы туылған, «Манкент шипажайы» АҚ бас директорының орынбасары;
Майқанов Ғалымжан Тастанұлы, 1969 жылы туылған, Түркістан облысының Ауғанстандағы соғыс ардагерлері одағының төрағасы;
Сатыбалды Дархан Амангелдіұлы, 1974 жылы туылған, уақытша жұмыссыз;
Үркімбаев Асқарбек Жүсіпұлы, 1953 жылы туылған, «Шымкент-сауда» ЖШС директоры.
Сайлау науқаны «Қазақстан Республикасындағы сайлау туралы» Қазақстан Республикасының Конституциялық заңына сәйкес өткізіледі.