21 тамызда Алматы қаласында БҰҰ-ның мүгедектер құқығы туралы Конвенциясын іске асыру аясында Қазақстан Республикасы Орталық сайлау комиссиясының жанындағы мүгедектердің сайлау құқықтарын қамтамасыз ету жөніндегі жұмыс тобының жетекшісі, Ортсайлауком мүшесі Ляззат Сулеймен жұмыс тобының мүшелері мен азаматтық қоғам өкілдерімен кездесті.

Кездесуге «Шырақ» мүгедек әйелдер қауымдастығы» қоғамдық бірлестіктің төрайымы, Алматы қаласы Мәслихатының депутаты Ләззат Қалтаева және Қ.Иманғалиев атындағы мүгедектердің құқықтары жөніндегі комиссия төрағасы Вениамин Алаев қатысты.

Іс-шараға қатысушылар «Еркіндік қанаты» қоғамдық қоры дайындаған 2016 жылғы ҚР Парламент Мәжілісі және еліміздегі маслихат депутаттарын кезектен тыс сайлауын өткізу кезінде мүмкіндіктері шектеулі жандардың сайлау құқықтарын пайдалану мәселелерін талқылады.

Аталған зерттеу жұмыстары Қазақстанның үш (Астана, Алматы, Павлодар) қаласында жүргізіліп, мүмкіндіктері шектеулі жандардың сайлау процесіне қатысуы бойынша сапалық және сандық индикаторларына негізделген.

Л.Сүлеймен зерттеу жұмыстары мемлекеттік саясатты жетілдіруге, мүмкіндіктері шектеулі жандардың сайлау құқықтарын қамтамасыз етуге қатысты қоғамдық пікір сапасының өзгеруіне бағытталғанын атап өтті.

Л.Қалтаева сайлау органдары мүгедектердің сайлау құқықтарын қамтамасыз етуге жан-жақты қолдау білдіруге міндетті екендігіне, сайлау заңнамасында түрлі мүгедектігі бар кандидаттардың жанама сайлау құқығын пайдалану кезінде айрықша қажеттіліктерінің көрініс табуына назар аударды.

В.Алаев сайлау космиссиялары мүшелерінің мүгедектермен байланыс орнатуды қажетті деңгейде білмейтіндігі туралы, сайлау учаскелерінің ғимараттың төменгі қабаттарында орналасу, сондай-ақ арнайы технологияларды, соның ішінде Брайль шрифтін пайдалана отырып, сайлау тақырыбындағы мүмкіндіктері шектеулі жандарға арналған аудио-визуалды, графикалық материалдарды шығару қажеттілігі туралы пікір білдірді.

Азаматтық қоғам өкілдері Ортсайлаукомның атқарып отырған жұмыстарына оң баға бере отырып, аталған жұмыс тобы аясындағы ынтымақтастық орнатуға дайын екендерін білдірді.

Естеріңізге сала кетейік, Ортсайлауком жанында мүгедектердің сайлау құқықтарын қамтамасыз ету жөніндегі жұмыс тобы ү.ж. тамыз айында құрылған болатын. Жұмыс тобына ҚР ОСК, ҚР Еңбек және әлеуметтік қорғау министрлігі өкілдері, Адам құқықтары жөніндегі орталық және азаматтық қоғам өкілдері енді.