БАСПАСӨЗ РЕЛИЗІ

2016 жылғы 1 шілдеде Алматы облысынан шығып қалған  

Қазақстан Республикасы Парламенті Сенаты депутатының орнына сайлау болады

2016 жылғы 16 мамырда Қазақстан Республикасы Орталық сайлау комиссиясының отырысы болды, онда 2016 жылғы 1 шілдеде Алматы облысынан шығып қалған Қазақстан Республикасы Парламенті Сенаты депутатының орнына сайлауды тағайындау туралы қаулы қабылданып, осы сайлауды дайындау және өткізу жөніндегі негізгі іс-шаралардың күнтізбелік жоспары бекітілді.

Сайлау заңнамасына сәйкес Сенат депутаттары жанама сайлау құқығы негiзiнде жасырын дауыс беру жағдайында сайланады. Жанама сайлау құқығы - Парламент Сенатының депутаттарын сайлауда дауыс беруге тек таңдаушылар - мәслихаттардың депутаттары ғана қатысатынын білдіреді.

Кандидаттарды ұсыну мәслихаттардың сессияларында, сондай-ақ өзін–өзі ұсыну тәртібімен жүзеге асырылады. Өздерінің мәслихаттардағы өкілдері арқылы саяси партиялар мен қоғамдық бірлестіктердің де кандидаттарды ұсынуға мүмкіндіктері бар.

Конституцияға және заңнамаға сәйкес жасы отызға толған, жоғары білімі және кемінде бес жыл жұмыс стажы бар, сондай-ақ еліміздің аумағында соңғы он жылда және өзі өкілдік ететін өңірде (яғни, Алматы облысында) соңғы үш жылда тұрақты тұрып жатқан Қазақстан азаматы Сенат депутаты бола алады.

Парламент Сенатының депутаттығына кандидат ретінде тіркелу үшін үміткер облыстың барлық мәслихаттары депутаттарының жалпы санының кемінде он пайызының қолдауын алуы тиіс. Бұл қолдау мәслихаттар депутаттарының тиісті қолдары санын жинау арқылы куәландырылады.

Сенат депутаттығына кандидат тіркеуге дейін және Конституция мен сайлау туралы заңда қойылған талаптарға оның сәйкестігін, сондай-ақ оны қолдауға жиналған қолдарды тексергеннен кейін сайлау жарнасын енгізеді. Осы жылы ол 342 мың 885 теңгені құрайды.

Сонымен қатар кандидат және оның зайыбы (жұбайы) тіркеуге дейін тұратын жері бойынша салық органдарына табысы және мүлкі туралы декларация тапсыруға міндетті.

Ортсайлауком бекіткен Күнтізбелік жоспарға сәйкес Алматы облысынан Парламент Сенатының депутаттығына кандидаттарды ұсыну ағымдағы жылдың 5 маусымына дейін созылады. Кандидаттарды тіркеу 2016 жылғы 12 маусымға дейін, ал сайлау алдындағы үгіт 13 маусымнан 29 маусымдағы 24 сағ. дейін жүреді.

Дауыс беруді, дауыстарды санауды және нәтижелерді жариялауды Алматы облыстық сайлау комиссиясы бір күн ішінде – 1 шілдеде жүргізеді.

Сайлаудың соңғы қорытындыларын Қазақстан Республикасы Орталық сайлау комиссиясы 2016 жылғы 7 шілдеден кешіктірмей белгілеуі тиіс.