22.03.2016 |
БАСПАСӨЗ РЕЛИЗІ
Орталық сайлау комиссиясы Қазақстан Республикасы Парламенті Мәжілісінің депутаттарын кезектен тыс сайлау қорытындыларын белгіледі
2016 жылғы 22 наурызда Қазақстан Республикасы Орталық сайлау комиссиясының отырысы болды, онда «Алтыншы шақырылатын Қазақстан Республикасы Парламенті Мәжілісінің депутаттарын кезектен тыс сайлаудың қорытындыларын анықтау және жариялау, партиялық тізімдер бойынша дауыс беру қорытындыларына қарай депутаттық мандаттарды бөлу туралы» қаулы қабылдады.
Облыстық, Астана және Алматы қалаларының аумақтық сайлау комиссиялары ұсынған деректерге сәйкес Орталық сайлау комиссиясы партиялық тізімдер бойынша сайлаудың мынадай қорытындыларын анықтады:
«Нұр Отан» партиясы - 6 183 757 дауыс немесе дауыс беруге қатысқан сайлаушылар дауысының 82,20 пайызы;
Қазақстан Коммунистік Халық партиясы – 537 123 дауыс немесе дауыс беруге қатысқан сайлаушылар дауысының 7,14 пайызы;
Қазақстанның «АҚ ЖОЛ» Демократиялық Партиясы – 540 406 дауыс немесе дауыс беруге қатысқан сайлаушылар дауысының 7,18 пайызы;
«Бірлік» Саяси Партиясы – 21 484 дауыс немесе дауыс беруге қатысқан сайлаушылар дауысының 0,29 пайызы;
Жалпыұлттық социал-демократиялық партия – 88 813 дауыс немесе дауыс беруге қатысқан сайлаушылар дауысының 1,18 пайызы;
«Ауыл» Халықтық-демократиялық патриоттық партиясы – 151 285 дауыс немесе дауыс беруге қатысқан сайлаушылар дауысының 2,01 пайызы;
Осылайша, сайлау туралы заңға сәйкес «Нұр Отан» партиясы Парламент Мәжілісі депутаттарының 84 мандатын, Қазақстанның «АҚ ЖОЛ» Демократиялық Партиясы – 7 мандатын және Қазақстан Коммунистік Халық партиясы – 7 мандатын алды.
Сондай-ақ Ортсайлауком Қазақстан халқы Ассамблеясы сайлайтын Қазақстан Республикасы Парламенті Мәжілісінің депутаттарын сайлаудың қорытындыларын белгіледі.
Қазақстан халқы Ассамблеясынан Парламент Мәжілісінің депутаттары болып: Сауытбек Абдрахманұлы Абдрахманов, Владимир Карпович Божко, Наталья Васильевна Жұмаділдаева, Роман Укенович Ким, Наринэ Гамлетовна Микаелян, Ахмет Сейдарахманович Мурадов, Шаймардан Усаинович Нурумов, Юрий Евгениевич Тимощенко, Шакир Хусаинович Хахазов сайланды.
ҚР ОСК бекіткен сайлау қорытындылары туралы ресми хабар БАҚ-та жарияланады және Ортсайлаукомның ресми интернет-ресурсында орналастырылады.
ҚР ОСК Төрағасы аталған қаулыны қабылдай отырып, Ортсайлауком елде соңғы екі ай бойы жүрген сайлау науқанын аяқтайтынын атап өтті.
«Осылайша, Қазақстан Республикасы Орталық сайлау комиссиясы Қазақстан Республикасы Президентінің Парламент Мәжілісі депутаттарының кезектен тыс сайлауын ұйымдастыру және өткізу туралы Жарлығының орындалуын қамтамасыз етті» - деді Қ. Тұрғанқұлов.
ҚР ОСК Басшысы отырыстың соңында сайлауды ұйымдастырушыларға адал және жауапты жұмысы үшін, байқаушыларға сайлау процесінің жариялылығы мен транспаренттігіне көмегі үшін, ал сайлаушыларға белсенді азаматтық ұстанымы үшін ризашылығын білдірді.
Баспасөз қызметі
тел. 75-28-44, 75-23-69