2023 жылғы 19 наурызға тағайындалған Қазақстан Республикасы Парламенті Мәжілісі және мәслихаттары депутаттарының

кезектен тыс сайлауында азаматтарды сайлау учаскелерінің мекенжайлары бойынша тіркеу туралы

 

БІРЛЕСКЕН ҚАУЛЫ ЖӘНЕ БҰЙРЫҚ

 

«Қазақстан Республикасындағы сайлау туралы» Қазақстан Республикасы Конституциялық Заңының 24, 25 және 26-баптарына, «Қазақстан Республикасының Ішкі істер органдары туралы» Қазақстан Республикасы Заңының 6-бабының 7-тармақшасына және Қазақстан Республикасы Үкіметінің 2019 жылғы 12 шілдедегі № 501 қаулысымен бекітілген Қазақстан Республикасының Цифрлық даму, инновациялар және аэроғарыш өнеркәсібі министрлігі туралы ереженің 1-тармағына сәйкес Қазақстан Республикасының Орталық сайлау комиссиясы ҚАУЛЫ ЕТЕДІ, Қазақстан Республикасының Ішкі істер министрлігі мен Қазақстан Республикасының Цифрлық даму, инновациялар және аэроғарыш өнеркәсібі министрлігі БҰЙЫРАДЫ:

1. 2023 жылғы 19 наурызға тағайындалған Қазақстан Республикасы Парламенті Мәжілісі және мәслихаттары депутаттарының кезектен тыс сайлауында азаматтарды сайлау учаскелерінің мекенжайлары бойынша тіркеу алгоритмі осы бірлескен қаулы мен бұйрыққа қосымшаға сәйкес бекітілсін.

2. Облыстардың, республикалық маңызы бар қалалардың және астананың жергілікті атқарушы органдары облыстардың, республикалық маңызы бар қалалардың және астананың тиісті аумақтық сайлау комиссияларымен бірлесіп, азаматтарды тіркеуге қатысты қабылдауды жүзеге асыру бойынша «Азаматтарға арналған үкімет» мемлекеттік корпорациясы» коммерциялық емес акционерлік қоғамының қызметкерлерін орналастыру үшін сайлау учаскелерін айқындасын, 2023 жылғы 10 наурызға дейінгі мерзімде Қазақстан Республикасының Орталық сайлау комиссиясына тиісті мәліметтерді ұсынсын.

3. Қазақстан Республикасының Цифрлық даму, инновациялар және аэроғарыш өнеркәсібі министрлігі «Азаматтарға арналған үкімет» мемлекеттік корпорациясы» коммерциялық емес акционерлік қоғамымен (келісу бойынша) бірлесіп, сайлау учаскелерінің мекенжайлары бойынша азаматтарды тіркеу үшін қабылдауды іске асырсын.

4. Осы бірлескен қаулы мен бұйрықтың орындалуын бақылау Қазақстан Республикасы Орталық сайлау комиссиясы Төрағасының орынбасарына, Қазақстан Республикасының Ішкі істер және Қазақстан Республикасының Цифрлық даму, инновациялар және аэроғарыш өнеркәсібі министрлерінің жетекшілік ететін орынбасарларына жүктелсін.

5. Осы бірлескен қаулы мен бұйрық қол қойылған күнінен бастап қолданысқа енгізіледі.

Қосымша...

Қазақстан Республикасы                    Орталық сайлау комиссиясының Төрағасы	Қазақстан Республикасының , Цифрлық даму, инновациялар және аэроғарыш өнеркәсібі министрінің м.а.
Н. Әбдіров	А. Оразбек
Қазақстан Республикасының Ішкі істер министрі
М. Ахметжанов

 

 

 

 

 

 

Астана қаласы,

2023 жылғы 7 наурыз,

№ 57/749

 

Астана қаласы,

2023 жылғы 7 наурыз,

№ 81/нқ

 

Астана қаласы,

2023 жылғы 7 наурыз,

№ 209