2022 жылғы 20 қарашаға тағайындалған Қазақстан Республикасы 

Президентінің кезектен тыс сайлауындағы шет мемлекеттердің, 

халықаралық ұйымдардың байқаушылары, шетелдік бұқаралық ақпарат 

құралдарының өкілдері қызметін ұйымдастыру туралы

 

«Қазақстан Республикасындағы сайлау туралы» Қазақстан Республикасының 1995 жылғы 28 қыркүйектегі Конституциялық Заңының

20-бабының 8-тармағына, 20-2-бабына сәйкес Қазақстан Республикасының Орталық сайлау комиссиясы ҚАУЛЫ ЕТЕДІ:

1. 2022 жылғы 20 қарашаға тағайындалған Қазақстан Республикасы Президентінің кезектен тыс сайлауында төмендегіше белгіленсін:

1) шет мемлекеттің, халықаралық ұйымның байқаушысына, сондай-ақ шетелдік бұқаралық ақпарат құралының өкіліне бір аудармашы өзінің жеке басын куәландыратын құжатын көрсеткен кезде ілесіп жүре алады;

2) шетелдік бұқаралық ақпарат құралының өкілі Қазақстан Республикасының Сыртқы істер министрлігі берген аккредиттеу туралы куәлігі болған кезде сайлауда байқауды жүзеге асыра алады.

2. Шет мемлекет, халықаралық ұйым байқаушысының қоса беріліп отырған сауалнамасының мәтіні бекітілсін.

3. Шет мемлекеттердің, халықаралық ұйымдардың байқаушыларын аккредиттеуді жүргізу 2022 жылғы 14 қарашаға cағат он сегізде аяқталады.

4. Осы қаулы Қазақстан Республикасының Сыртқы істер министрлігіне, облыстық, республикалық маңызы бар қалалардың және астананың сайлау комиссияларына жіберілсін.

Қосымша...

Председатель	Н. Абдиров
Секретарь	М. Ерман

 

 

 

Астана қаласы,

2022 жылғы 22 қыркүйек

№ 65/539