2021 жылғы 10 қаңтарға тағайындалған Қазақстан Республикасы Парламенті Мәжілісінің және мәслихаттарының депутаттарын сайлауда сайлаушылар тізімдерімен жұмысты ұйымдастыру туралы

«Қазақстан Республикасындағы сайлау туралы» Қазақстан Республикасының 1995 жылғы 28 қыркүйектегі Конституциялық заңының 10-бабының 5-тармағына, 12-бабының 1), 2) және 5) тармақшаларына, 14-бабының 4-1) тармақшасына, 24, 25, 26, 26-1-баптарына, 48-бабы 2-тармағының 2) тармақшасына және 3-тармағына сәйкес Қазақстан Республикасы Орталық сайлау комиссиясы ҚАУЛЫ ЕТЕДІ:

1. Жергілікті атқарушы органдар:

1) сайлаушылар тізімдерін қалыптастыруды «Қазақстан Республикасындағы сайлау туралы» Қазақстан Республикасының Конституциялық заңына, «Дауыс беруге арналған сайлаушылар тізімдерін қалыптастыру, сондай-ақ оларды сайлау комиссияларына ұсыну қағидаларын бекіту туралы» Қазақстан Республикасы Орталық сайлау комиссиясының 2018 жылғы 23 тамыздағы № 11/197 қаулысына сәйкес қамтамасыз етсін;

2) сайлаушылар тізімдерінің толықтығы мен дұрыстығы, коронавирустық инфекцияның таралуына байланысты тәуекелдердің алдын алу, санитарлық-эпидемиологиялық қауіпсіздікті қамтамасыз ету және азаматтардың денсаулығын қорғау мақсатында сайлаушылардың тізімге енгізілгенін тексеру бойынша ақпараттық сервистердің (Call-орталықтар, цифрлық сервистер, интернет-ресурстар) барынша жұмыс істеуін қамтамасыз етсін;

3) азаматтарға оларды сайлаушылар тізіміне енгізу туралы ақпарат беру жөніндегі Call-орталықтардың жұмысын ұйымдастырсын;

4) азаматтарды өңірде іске асырылатын сервистер туралы, оның ішінде уақытша тіркелген азаматтарды сайлаушылар тізімдеріне енгізу тәртібі туралы кеңінен хабардар етуді қамтамасыз етсін;

5) қолданыстағы заңнамаға сәйкес сайлаушылардың тізіміне енгізу туралы азаматтардың өтініштерімен жұмысты ұйымдастыру бойынша жұмыс топтарын құрсын және қызметін ұйымдастырсын;

6) сайлаудан кемінде отыз күн бұрын келіп түскен жазбаша өтініш негізінде тиісті аумақтық сайлау комиссиясына азаматтарды сайлаушылар тізіміне енгізу туралы мәліметтердің ұсынылуын қамтамасыз етсін;

7) дауыс беру басталардан жиырма күн бұрын әрбір сайлау учаскесі бойынша сайлаушылардың тізімдерін акт бойынша тиісті сайлау комиссияларына белгіленген тәртіппен ұсынуды қамтамасыз етсін.

2. Аумақтық сайлау комиссиялары:

1) жергілікті атқарушы органдардың азаматтарды сайлаушылар тізіміне сайлауға кемінде отыз күн қалғанда келіп түскен жазбаша өтініштің негізінде жоғары тұрған сайлау комиссиясына ұсынуды қамтамасыз етсін;

2) жергілікті атқарушы органдардың дауыс беруге арналған сайлаушылардың өзекті тізімдерін акт бойынша ұсынуының уақтылылығын бақылауды қамтамасыз етсін;

3) сайлаушылар тізімдерін жергілікті атқарушы органдардан алған күннен бастап екі күн мерзімде оларды электрондық түрде Орталық сайлау комиссиясына тапсырсын;

4) учаскелік комиссиялардың белгіленген тәртіппен сайлаушылар тізімдерін танысу үшін уақтылы ұсынуын бақылауды қамтамасыз етсін;

5) сайлаушылар тізіміне өзгерістер енгізілген жағдайда учаскелік сайлау комиссиясының шешімі бойынша бір күн мерзімде бұл туралы Орталық сайлау комиссиясына хабарласын.

3. Учаскелік сайлау комиссиялары:

1) дауыс беру күніне он бес күн қалғанда тиісті учаскелік сайлау комиссияларының үй-жайларында танысу үшін сайлаушылар тізімдерін ұсынсын;

2) сайлаушылар тізімдеріне енгізу, олардан шығарып алу немесе сайлаушылар тізімдеріне түзетулер енгізу қажеттігі туралы арыздарды сайлау комиссиясына арыз келіп түскен күні қарауды қамтамасыз етсін;

3) сайлаушылар тізімдеріне өзгерістер енгізілген жағдайда бұл туралы жоғары тұрған сайлау комиссиясына дереу хабарласын.

4. 2021 жылғы 10 қаңтарға тағайындалған Қазақстан Республикасы Парламенті Мәжілісінің және мәслихаттары депутаттарының сайлауында жергілікті атқарушы органдардың Call-орталықтарының жұмысын ұйымдастыру жөніндегі ұсынымдар қосымшаға сәйкес бекітілсін.

5. Осы қаулы Орталық сайлау комиссиясының ресми интернет-ресурсында орналастырылсын және облыстардың, республикалық маңызы бар қалалардың, астананың әкімдеріне, аумақтық сайлау комиссияларына орындау үшін жіберілсін.

6. Осы қаулы қол қойылған күнінен бастап қолданысқа енгізіледі.

Қосымша...

Қазақстан Республикасы Орталық сайлау комиссиясының Төрағасы	Б. Имашев
Қазақстан Республикасы Орталық сайлау комиссиясының Хатшы	С. Мұстафина

Нұр-Сұлтан қаласы,

2020 жылғы 27 қазан,

№ 32/339