ҚР ОСК 30 жылдығына орай Халықаралық ғылыми-практикалық

конференция өз жұмысын аяқтады

2023 жылғы 8 желтоқсанда Астанада ҚР Орталық сайлау комиссиясының 30 жылдығына арналған Халықаралық ғылыми-практикалық конференция аяқталды.

Екінші күн аясында ЭКСПО ғимаратындағы цифрлық үкімет офисінде ҚР Цифрлық даму және аэроғарыш өнеркәсібі министрлігінің қызметкерлері шетелдік қонақтар үшін ҚР цифрлық үкіметінің тұжырымдамасы және функционалымен таныстырып, оның жұмысын көрсетіп, елдегі цифрлық экожүйенің трансформациясы туралы айтып берді.

Сонымен қатар, екінші күні сайлау процесі мәселелері бойынша басылымдардың тұсаукесері өтті.

ҚР ҒЖБМ ҒК Философия, саясаттану және дінтану институтының бас директоры, әлеуметтану ғылымдарының докторы, профессор, ҚР ҰҒА академигі Серік Сейдуманов Институт ғалымдарының ауқымды ғылыми еңбегі – мемлекеттің сайлау жүйесін дамыту туралы «Қазақстан Республикасы Орталық сайлау комиссиясына – 30 жыл. Қазақстан Республикасының сайлау жүйесін трансформациялау» монографиясымен қонақтарды таныстырды. Бұл жұмыста ҚР ОСК құрылуы мен жұмыс істеуіне, елдің сайлау жүйесін жаңғыртуға және қазақстандық қоғамды демократияландыру процесіне сайлаудың ықпалы талданды.

Заң ғылымдарының докторы, профессор Марат Қоғамов конференция қатысушыларына ҚР ОСК 30 жылдығына орай құқықтанушы ғалымдар тобы дайындаған «Қазақстан Республикасындағы сайлау туралы» Конституциялық заңға түсініктемесін ұсынды. Авторлық ұжымға Индира Әубәкірова, Исидор Борчашвили, Николай Турецкий, Лейла Жақаева, Лейла Жанұзақова, Эльмира Қалиева, Эдуард Мұхамеджанов, Әліпаша Қараев және Жаннета Қалышева сияқты көрнекті қазақстандық заңгер-ғалымдар кірді.

Сондай-ақ 2012-2023 жылдар аралығында өткізілген сайлау және референдумдар туралы ақпараттық жинағының екінші томы таныстырылды. Онда 14 елдік сайлау науқаны бойынша, оның ішінде Қазақстан Республикасы Президентінің 3 сайлауы бойынша, Парламент Сенатына 4 сайлау бойынша және Парламент Мәжілісіне 3 сайлау бойынша материалдар жинақталған.

Конференция профессор Индира Әубәкірова дайындаған электоралдық терминдердің онлайн-сөздігінің тұсаукесерімен аяқталды. Сөздік Орталық сайлау комиссиясының www.election.gov.kz сайтында қол жетімді, әркім қалауы бойынша сайлау тақырыптары бойынша таратылған терминдердің анықтамаларымен таныса алады.

Екі күндік ғылыми-практикалық конференцияны қорытындылай келе, Нұрлан Әбдіров іс-шараның ақпаратқа толы күндеріне көз жүгірте отырып, әлемде қолданылатын сайлау тәжірибелерінің, технологиялары мен жүйелерінің алуан түрлілігінің бар екенін атап өтті. Сайлау құқығы институтының негізінде әмбебап қағидаттар болса да, олар егеменді мемлекеттерге өздерінің конституциялық бірегейлігі мен қоғамдық дамудың қазіргі кезеңдеріне сүйене отырып, өздерінің сайлау моделін құруға жеткілікті мүмкіндіктер береді.

Ол барлық қатысушылар мен қонақтарға алғысын білдіріп, барлығына жемісті жұмыс, қызықты пікірталастар мен жаңа шығармашылық идеялар тіледі.