12.10.2022 |
Қ.К. Тоқаевты Қазақстан Республикасының Президенттігіне кандидат
ретінде тіркеу мәселесі бойынша Орталық сайлау комиссиясының
отырысы өтті
2022 жылғы 12 қазанда Нұрлан Әбдіровтің төрағалығымен Қасым-Жомарт Кемелұлы Тоқаевты Қазақстан Республикасының Президенттігіне кандидат ретінде тіркеу мәселесі бойынша Орталық сайлау комиссиясының отырысы өтті.
Күн тәртібіндегі мәселе бойынша Ортсайлауком хатшысы Мұхтар Ерман баяндама жасады. Ол 2022 жылдың 7 қазанында Орталық сайлау комиссиясына бірқатар республикалық қоғамдық бірлестіктер Қасым-Жомарт Кемелұлы Тоқаевты Қазақстан Республикасы Президенттігіне кандидат етіп ұсыну туралы құжаттарды ұсынғанын хабарлады. Орталық сайлау комиссиясына кандидатты тіркеу үшін мынадай құжаттар ұсынылды:
- Президенттікке кандидат Қасым-Жомарт Кемелұлы Тоқаевтың активтер мен міндеттемелер жөнінде декларация тапсырғаны туралы Мемлекеттік кірістер органының анықтамасы;
- Президенттікке кандидат Қасым-Жомарт Кемелұлы Тоқаевтың оны тіркеуге кедергі келтіретін аурулардың жоқтығы туралы медициналық қорытындысы;
- облыстардың, республикалық маңызы бар қалалардың және Республика астанасының аумақтық сайлау комиссияларының Президенттікке кандидат Қасым-Жомарт Кемелұлы Тоқаевты қолдап жиналған азаматтардың қолдарын тексеру нәтижелері туралы хаттамалары.
Осы хаттамаларға сәйкес Президенттікке кандидат Қ.К. Тоқаевтың қолдауына Қазақстанның барлық 20 өңірінен 399809 азаматтың қолы жиналды.
Қазақстан Республикасының Президенттігіне кандидатты қолдау үшін рас қолдардың қажетті қолдар санының шегіне жетуіне байланысты (кемінде 118 273 қол, ҚР ОСК № 69/549 қаулысы) тексеру тоқтатылды.
Қ.К. Тоқаевты Президенттікке кандидат ретінде тіркеуге қажетті барлық құжаттар Орталық сайлау комиссиясына ұсынылды және оларға қойылатын талаптарға толық сәйкес келеді.
ҚР ОСК қаулысымен Қасым-Жомарт Кемелұлы Тоқаев 2022 жылғы 20 қарашаға тағайындалған Қазақстан Республикасының Президентінің кезектен тыс сайлауында Қазақстан Республикасының Президенттігіне кандидат болып тіркелді.
Орталық сайлау комиссиясы отырысының қорытындылары бойынша бұқаралық ақпарат құралдары өкілдерінің қатысуымен брифинг өтті.