ҚР ОСК «Электрондық ресурстар арқылы жүргізілетін сайлау алдындағы үгіт» атты халықаралық дөңгелек үстел жұмысына қатысты

2021 жылғы 8 маусымда онлайн форматта ТМД Парламентаралық Ассамблеясына қатысушы мемлекеттер азаматтарының сайлау құқықтарын сақтау, демократияның, парламентаризмнің дамуына мониторинг жүргізу халықаралық институты Армения Республикасының Орталық сайлау комиссиясымен бірлесе отырып ұйымдастырылған «Электрондық ресурстар арқылы жүргізілетін сайлау алдындағы үгіт» атты халықаралық дөңгелек үстел өтті.

Халықаралық дөңгелек үстел жұмысына Армения Республикасы, Беларусь Республикасы, Қырғыз Республикасы, Ресей Федерациясы және Өзбекстан Республикасы парламенттерінің, орталық сайлау органдарының өкілдері, сондай-ақ ғалымдар мен сарапшылар қатысты. Қазақстан Республикасынан - Қазақстан Республикасы Орталық сайлау комиссиясы аппаратының БАҚ-пен және қоғамдық бірлестіктермен өзара іс-қимыл жөніндегі бөлім меңгерушісінің орынбасары Ғалымжан Жалмурзаев қатысты.

Дөңгелек үстел барысында Армения Республикасында сайлауды өткізу кезінде электрондық ресурстарды пайдалану, сондай-ақ ТМД Парламентаралық Ассамблеясына қатысушы мемлекеттердің тәжірибесін ескере отырып, сайлау алдындағы үгітті құқықтық реттеу мәселелері талқыланды.

Дөңгелек үстел соңында қатысушылар азаматтардың сайлау процесіне деген сенімін арттырудың өзектілігін, цифрлық ортадағы саяси үгітті реттеу үшін қабылдауға болатын практикалық шараларды атап өтті.