ОСК Төрағасы Нұрлан Әбдіровтің Шанхай ынтымақтастық 

ұйымының делегациясымен кездесуі өтті

18 қарашада Қазақстан Республикасы Орталық сайлау комиссиясының Төрағасы Нұрлан Әбдіров миссия басшысы Чжан Мин бастаған Шанхай ынтымақтастық ұйымының делегациясымен кездесті. 

Ортсайлауком Төрағасы делегация мүшелеріне сайлау науқанының негізгі кезеңдерінің қорытындыларын, Президенттікке тіркелген кандидаттар туралы ақпаратты ұсынды, сондай-ақ бүгін сайлау алдындағы үгіт кезеңі аяқталатынын, ал ертең, 19 қараша тыныштық күні екенін атап өтті. 

Делегация мүшелері кандидаттарды ұсыну және тіркеу кезеңдері бойынша нақтылайтын сұрақтар қойып, сайлау процесін ұйымдастырудың жоғары деңгейін атап өтті. 

Сондай-ақ, кездесу аясында Нұрлан Әбдіров ШЫҰ өкілдерін сайлаушылар мен сайлау учаскелерінің саны, Президент сайлауына халықаралық бақылаушыларды аккредиттеу қорытындылары туралы хабардар етті. 

ШЫҰ өкілдері берілген ақпарат үшін алғыстарын білдіріп, биыл олар Қазақстан Республикасындағы сайлау процесін байқауға екінші мәрте қатысып отырғанын атап өтті. 

Кездесу соңында ШЫҰ делегациясының мүшелері ОСК мүшелеріне сайлау өткізуде табыс тіледі. Кездесуден кейін БАҚ өкілдеріне арналған ШЫҰ миссиясының брифингі өтті, онда миссия мүшелері БАҚ сұрақтарына жауап берді.