ОСК Төрағасы Нұрлан Әбдіровтің ТМД ПАА 

делегациясымен кездесуі өтті

 

19 қарашада Қазақстан Республикасы Орталық сайлау комиссиясының Төрағасы Нұрлан Әбдіров мониторингтік топтың үйлестірушісі, Тәжікстан парламенті төменгі палатасының вице-спикері Дилрабо Мансури бастаған ТМД Парламентаралық Ассамблеясының делегациясымен кездесті. 

Ортсайлауком Төрағасы делегация мүшелеріне сайлау науқанының негізгі кезеңдерінің қорытындыларын, Президенттікке тіркелген кандидаттар, ел бойынша сайлаушылар мен сайлау учаскелерінің саны, шетелде дауыс беруді ұйымдастыру және халықаралық байқаушыларды аккредиттеу қорытындылары туралы ақпаратты ұсынды. 

Өз кезегінде ТМД ПАА байқаушылар тобының үйлестірушісі Дилрабо Мансури топтың құрамы, ұзақ мерзімді мониторинг жүргізу ерекшеліктері, бақылау географиясы туралы айтып берді, сондай-ақ Миссия мүшелері ТМД-ға қатысушы мемлекеттердің демократиялық сайлау стандарттары: саяси бейтараптық, мемлекеттің ішкі істеріне араласпау туралы Конвенцияда белгіленген қағидаттарды басшылыққа алатынын атап өтті. Делегация мүшелері сайлау алдындағы үгіт кезеңін өткізуге, атап айтқанда, осы кезеңдегі заңнаманы бұзу санына, сондай-ақ дауыс беру күні қоғамдық пікірге сауал салуды жүргізу ерекшеліктеріне қызығушылық танытты. 

ТМД ПАА өкілдері биыл Қазақстан Республикасындағы сайлау процесін байқауға екінші рет қатысып отырғанын, сондай-ақ сайлау процесін ұйымдастырудың жоғары деңгейін атап өтті.
Кездесуден кейін БАҚ үшін ТМД ПАА брифингі өтті.