Орталық сайлау комиссиясы Төрағасының орынбасары К.В. Петров Ақтөбе облысының сайлау комиссияларының мүшелері үшін оқыту семинарын өткізді

18 мамырда Ақтөбе қаласында Ақтөбе облысы сайлау комиссияларының мүшелері мен сайлау процесінің басқа да қатысушылары үшін семинар болды.

Бейнеконференцбайланыс режимінде облыстың барлық аудандары қатысты.

Орталық сайлау комиссиясы Төрағасының орынбасары К.В. Петров семинарға қатысушылардың назарын сайлау заңнамасындағы өзгерістерге, өтіп жатқан сайлау науқанының негізгі кезеңдеріне, барлық сайлау комиссияларының қызметіндегі ашықтық пен жариялылыққа, қолданыстағы заңнама талаптарының қатаң түрде сақталуына аударды.

Сайлау учаскелерін материалдық-техникалық жарақтандыру, соның ішінде мүмкіндіктері шектеулі адамдарға жағдайларды қамтамасыз ету бойынша қабылданған іс-шаралар, сайлаушылар тізімдерін жасау бойынша жүргізілген жұмыс туралы Ақтөбе облысы әкімі аппаратының басшысы Н.С. Қалауов баяндады. Сайлаушылар үшін тізімге енгізілгенін анықтау және өзінің сайлау учаскесін іздеу бойынша Call-орталықтары, анықтама қызметтері (жедел байланыс) құрылды, http://aktobe.gov.kz интернет сервисі көзделген. Ақтөбе қаласы тұрғындарының ыңғайлылығы үшін @AktKzBot телеграмм боты іске қосылды, http://akt.gov.kz/ru интернет сервисі құрылды.

Облыстық сайлау комиссиясының төрағасы Г.Н. Күнбаева сайлау комиссиялары заңнамада көзделген өкілеттіктерге сәйкес жүргізген жұмысы, учаскелік сайлау комиссияларының мүшелерін оқыту, сайлау учаскелерінің дауыс беру күніне даярлығы туралы ақпарат берді.

Даярлық кезеңіндегі, сол сияқты тікелей дауыс беру күніндегі учаскелік сайлау комиссиялары қызметінің мәселелеріне Орталық сайлау комиссиясының сайлау процесін ұйымдастыру бөлімінің меңгерушісі Д.Т. Ысқақов толығырақ тоқталып өтті.

Дауыс беру күніндегі учаскелік комиссиялардың жұмысы туралы Ортсайлауком дайындаған оқыту фильмі көрсетілді.

Белсенді пікір алмасу және сайлау комиссияларының жұмысын ұйымдастыру мәселелерін талқылау болды.

Семинарға қатысқан «Ұлт тағдыры» бірлескен ұлттық-патриоттық қозғалысы» ҚБ сайлау алдындағы штабының өкілі А. Италиев, «Аманат» сайлау мониторингі жөніндегі азаматтық платформасының өкілі А. Кудеев Орталық сайлау комиссиясының сайлау процесіне қатысушыларды оқыту мәселелеріне деген тәсіліне оң баға берді.