22.05.2017 |
БАСПАСӨЗ РЕЛИЗІ
2017 жылғы 22 мамырда 2017 жылғы 28 маусымға тағайындалған
ҚР Парламенті Сенатының депутаттарын сайлауды ұйымдастырудың кейбір мәселелері бойынша ҚР ОСК отырысы болды
2017 жылғы 22 мамырда Қазақстан Республикасы Орталық сайлау комиссиясының отырысы болды.
ҚР ОСК отырысында 2017 жылғы 28 маусымға тағайындалған Қазақстан Республикасы Парламенті Сенатының депутаттарын сайлауда шет мемлекеттердің, халықаралық ұйымдардың, шетелдік бұқаралық ақпарат құралдары өкілдерінің қызметін ұйымдастырудың аспектілері қаралды.
Сайлау туралы Конституциялық заңға сай халықаралық ұйымдар мен шет мемлекеттердің байқаушыларын Қазақстан Республикасы Сыртқы істер министрі мен Қазақстан Республикасы Орталық сайлау комиссиясының Төрағасы шақырады.
ҚР ОСК Төрағасы Б.М. Имашев сайлау саласында екіжақты байланыс орнатылған шет мемлекеттердің орталық сайлау органдары басшыларының атына шақыру хаттары жіберілгені туралы ақпараттандырды.
ТМД Атқару комитетіне Қазақстан Республикасы Сыртқы істер министрінің шақыруы жіберілді. Сондай-ақ Шанхай ынтымақтастық ұйымынан, Түркітілдес мемлекеттердің ынтымақтастық кеңесінен, Түркітілдес елдердің Парламенттік Ассамблеясынан, Ислам ынтымақтастық ұйымынан байқаушыларды сайлауға шақыру жоспарланып отыр.
Өз кезегінде, ТМД Атқару комитеті ТМД Парламентаралық Ассамблеясына, Ресей мен Беларусь Одағының Парламенттік жиналысына, ҰҚШҰ Парламенттік Ассамблеясына, сондай-ақ басқа да ТМД-ға мүше мемлекеттерге тиісті хаттар жіберіп, ТМД-дан байқаушылар миссиясын қалыптастыруға кірісті.
ҚР ОСК қаулысымен шет мемлекеттердің, халықаралық ұйымдардың байқаушылары үшін сауалнама мәтіні бектіліп, оларды аккредиттеуді жүргізу мерзімдері 2017 жылғы 22 маусымға дейін белгіленді. Шет мемлекеттің, халықаралық ұйымның байқаушысына, сондай-ақ шетелдік бұқаралық ақпарат құралының өкіліне жеке басын куәландыратын құжатын көрсеткен жағдайда аудармашы ілесіп жүре алады.
Сонымен қатар шетелдік бұқаралық ақпарат құралдарының өкілдері сайлауды байқауды Қазақстан Республикасы Сыртқы істер министрлігі берген аккредиттеу туралы куәлігі болған жағдайда жүзеге асырады деп айқындалған.