БАСПАСӨЗ РЕЛИЗІ

2017 жылғы 17-18 мамырда ҚР ОСК мүшесі М.Сәрсембаевтың қатысуымен Оңтүстік Қазақстан мен Жамбыл облыстарында Қазақстан Республикасы Парламент Сенаты депутаттарының сайлауын ұйымдастыру мен өткізу мәселелері бойынша кеңестер өтті

2017 жылғы 17-18 мамырда Шымкент және Тараз қалаларында ҚР ОСК мүшесі М.Сәрсембаевтың қатысуымен Қазақстан Республикасы Президентінің Жарлығымен 2017 жылғы 28 маусымға тағайындалған Парламент Сенаты депутаттарының сайлауы бойынша сайлау науқанын ұйымдастыру және өткізу мәселелеріне арналған кеңестер өтті. 

Кеңестердің жұмысына қатысу үшін Оңтүстік Қазақстан, Жамбыл облыстық сайлау комиссиялары, сондай-ақ мәслихаттар хатшылары, прокуратура, ішкі істер органдары мен Қазақстан Халық банкі филиалдарының өкілдері шақырылды.

Бұл кеңестерді өткізу мақсаты сайлау органдарының алдында тұрған бірінші кезекті мақсаттарды анықтау және алдағы сайлау науқанын ұйымдастыру мен өткізуге қатысты мәселелерді талқылау. 

Кеңестер барысында қатысушылар сайлау комиссиялары, мемлекеттік органдар мен сайлау процесіне қатысушылардың сайлау науқанының барлық кезеңдерінде сайлау заңнамасы нормаларының сақталуын қамтамасыз ету жөніндегі бірлескен іс-қимылдарын үйлестіру мәселелеріне баса назар аударды. 

Сондай-ақ облыстық сайлау комиссияларының Сенат депутаттығына кандидаттарды және олардың сенім білдірілген адамдарын тіркеу, дауыс беруге арналған пункттерді дайындау, дауыс беруді өткізу, оның нәтижелерін шығару және көптеген басқа да рәсімдер бойынша өздерінің құзіреттерін іске асыруына тікелей байланысты мәселелер жөнінде пікір алмасылды. 

«Дауыс беру еркіндігі мен құпиялылығы қағидаттары негіз қалаушы қағидаттар болып табылады және бұлжытпай сақталуы тиіс. Біз алдағы саяси науқанын жоғары ұйымдастырушылық деңгейде өткізуді қамтамасыз ете алатындығымызға сенімдімін», - деп атап өтті өз сөзінде Ортсайлауком мүшесі М.Сәрсембаев.