БАСПАСӨЗ РЕЛИЗI 

Бүгін, 2017 жылғы 10 мамырда  ҚР ОСК мүшелері К.Петров пен Л. Сүлеймен қатысқан Корея Республикасының Президентін сайлауды байқау жөніндегі Миссия аяқталды.

Арнайы ұйымдастырылған қорытынды кездесуде бірқатар елден халықаралық байқаушылар сайлаушылардың жоғарғы келуін – 77%, мерзімінен бұрын дауыс беру барысындағы олардың белсенділігін (26%), сондай-ақ сайлау науқанының жалпы сайлау заңнамасына сәйкес қалыпты жағдайда өткенін атап өтті.

Сөз сөйлегендер өздерінің кандидаттарын ұсынған барлық саяси партиялар қатысқан үгіт науқаны тиісті дәрежеде сайлаушылардың хабардар болуына ықпал етіп, олардың дұрыс таңдау жасауына мүмкіндік берді деп мәлімдеді. Ал сайлау процесіне қатысушыларды оқыту жөнінде елде жүргізіліп жатқан жұмыс олардың сайлаудың барлық кезеңдерінде белсенділігінің жоғары болуына ықпал етті.

Сайлауда қолданылған жабдық азаматтарға өзінің тіркелген жерінен тыс елдің кез келген жерінен мерзімінен бұрын дауыс беруге мүмкіндік беріп, дауыстарды санау және нәтижелерді шоғырландыру уақытын едәуір қысқартты (келесі таңда сайланған президент Ұлттық жиналыстың отырысында қызметіне кірісті). Сонымен қатар байқаушылар кейбір кемшіліктерге, атап айтқанда дауыс беруге және қорытындыларды шығаруға арналған үй-жайлардың толығымен сәйкес еместігін, олардың кейбіреулері ғимараттардың бірінші қабатында орналаспағанын көрсетті. Әлеуметтанушылық зерттеулерді жүзеге асыратын ұйымдармен кездесулердің қажеттігіне ниет білдірді.

Корея ҰСК өкілі Бьён Ги Мун миссияға қатысушылардың барлығына байқауға қатысқаны үшін алғысын білдіріп, олардың ескертулері мен тілектері талданатынын айтты.

Қазақстандық өкілдер 4 және 5 мамырда өткен мерзімінен бұрын дауыс беру барысын байқау мүмкіндігіне ие болды, сайлаушыларды сәйкестендіру үшін, қолданылған дауыстарды санауға және нәтижелерді өңдеуге арналған ақпараттық-коммуникациялық жабдықты зерделеді. 9 мамырда дауыс беру барысымен, оның аяқталуымен, сондай-ақ арнайы жабдықталған жинақтау пункттерінде дауыстарды санаумен танысты.