Қазақстан Республикасы Орталық сайлау комиссиясының қаулысына сәйкес ағымдағы жылғы 1 шілдеде  Алматы облысынан шығып қалған Қазақстан Республикасы Парламенті Сенаты депутатының орнына сайлау болды.  

Сайлау науқанының барысында барлығы жеті кандидат ұсынылған болатын, олардың үшеуі тіркелді. 28 маусымда тіркелген кандидаттардың біреуі жеке өтініші бойынша
өз кандидатурасын алып тастады.

Осылайша, сайлау бюллетеніне екі кандидаттың – Н.Н. Қылышбаевтың және
Е.Т. Мұжиқовтың тегі енгізілді. 

Дауыс беруді, дауыстарды санауды және дауыс беру нәтижелерін жария етуді Алматы облыстық сайлау комиссиясы бір күннің ішінде – 1 шілдеде жүргізді.

Алматы облыстық сайлау комиссиясы ұсынған алдын ала деректерге сай, сайлау өткізілді деп танылды.

Тізімге енгізілген 334 таңдаушы ішінен дауыс беруге 324 таңдаушы немесе олардың жалпы санының 97 пайызы қатысты.

Дауыс беру барысы мен дауыстарды санау рәсімін байқауды кандидаттардың 2 сенім білдірген адамы, саяси партияның 1 өкілі және БАҚ-тардың 3 өкілі жүзеге асырды.    

Алдын ала деректер бойынша, Нұрлан Наурызұлы Қылышбаевқа 288 таңдаушы немесе олардың жалпы санының 88,9 %, ал Ермек Тоқтарбекұлы Мұжиқовқа 35 таңдаушы немесе олардың жалпы санының 10,8 % өз дауыстарын берді. 1 бюллетень жарамсыз деп танылды.

Сайлау заңнамасына сай Орталық сайлау комиссиясы сайлаудың соңғы қорытындыларын 2016 жылғы 7 шілдеден кешіктірмей белгілеп, 10 шілдеден кешіктірмей БАҚ-тарда жариялайды.  

Сайлау науқаны сайлау заңнамасы нормаларының талаптарына сәйкес өтті. Орталық сайлау комиссиясына шағымдар мен өтініштер келіп түскен жоқ.